Павлодарлық жас шахматшылар «Chess Class» олимпиадасында жеңіске жетті

Астана қаласында өткен «Chess Class» олимпиадасына 35 командадан тұратын 175 талантты және тәжірибелі шахматшылар қатысты. Турнирдің жүлде қоры 3 млн теңгені құрады. Турнир 7 турдан тұратын швейцариялық жүйе бойынша өтті.

7 турдың қорытындысы бойынша Павлодар қаласының №29 мектебінің командасы турнирдің жеңімпазы атанып, 900 000 теңге көлемінде ақшалай сыйлық иеленді.

Облыс әкімі Асайын Байханов шахмат олимпиадасының жеңімпаздарымен кездесіп, оқушыларды жеңістерімен құттықтап, оқуда және спортта одан әрі жоғары жетістіктер тіледі.

- Өтіп бара жатқан жылдың қоржыны тағы бір лайықты жеңіспен толықты. Шахматтан республикалық «Chess Class» олимпиадасының алғашқы чемпиондары сіздер болғандарыңыз ерекше қуантады. Мақтан тұтамын және оқушыларымыздың зияткерлік, спорттық және шығармашылық конкурстардағы жеңістерімен бүкіл облыс мақтанады, - деді облыс әкімі.

«Chess Class» олимпиадасы - Қазақстанның білім беру жүйесінде шахматты дәріптеу бойынша ауқымды бағдарламаның бір бөлігі.

Өңір басшысы Павлодар облысы республикада бірінші болып «Мектептегі шахмат» жобасын жүзеге асыра бастағанын атап өтті. Бүгінгі таңда облыстың оқу орындарында жалпы саны 12,5 мыңнан астам баланы қамтитын 245 шахмат кабинеті жұмыс істейді.

Асайын Байханов ұстаздарға алғысын білдіріп, балаларымызды өз елінің патриот азаматтары етіп тәрбиелеу мен оқыту үшін мектептің, отбасының, қоғам мен мемлекеттің бірлескен күш-жігері маңызды екенін атап өтті.

• 05.01.2025
• 58