Өңірдің әлеуметтік-экономикалық және индустриялық аймақтарының қызметі мен даму перспективаларын талқылады

Алматы облысындағы «Қорғас – Шығыс қақпасы» АЭА пен 6 индустриалды аймақты дамыту қорытындылары, мүмкіндіктері мен жоспарлары туралы мәселе талқыланды.

Жиын барысында «Қорғас – Шығыс қақпасы» АЭА-ның қазіргі жұмысы туралы «Қорғас – Шығыс қақпасы» АЭА Басқару компаниясы» АҚ бас директоры Мұрат Баймұханбетов баяндады.

Оның айтуынша, Қорғас ХШЫО аумағында 23 инвестициялық компания өз қызметін жүргізіп отыр. Олар 10 мыңнан астам жұмыс орны ашылатын, құны 113,17 млрд. теңгелік 32 инвестициялық жобаны іске асыруда. Олардың арасында жылына 30 мың тонна өнім шығаратын «SSA Feed Mills» ЖШС-ның құрама жем зауыты, алаңы 25 мың шаршы метрлік «KIF Warehouses» қойма кешені, жылына 15 мың тонна қуаттылықпен «Заря Ltd» ЖШС астық терминалы және басқа да нысандар бар.

Бүгінгі күнге жалпы құны 4,4 млрд. теңгеге 7 нысан іске қосылды. Бұл – 30 мың шаршы метр сауда алаңы мен 750 жұмыс орны деген сөз. Жалпы құны 29,23 млрд. теңге болатын 10 нысанда құрылыс монтаж жұмыстары жүріп жатыр. 50,22 млрд. теңгелік 11 нысан жүзеге асырылу үстінде. Инвестициялық жобаларды іске асыру есебінен бүгінгі күні 28 млрд. теңге инвестиция салынды.

Перспективалы бағыттардың арасында әуежайдың, типтік қоймалар мен цехтардың құрылысы, тұрғын үй және коммерциялық жылжымайтын мүліктердің құрылысы, ІТ-платформаларды дайындау және енгізу бағыттары бар.

Амандық Баталов экономикалық аймақ инфрақұрылымдарын дамыту мен жоспарланған жобаларды сапалы жүзеге асыру жұмыстарын жалғастыруды тапсырды.

Индустриалды аймақтарды одан әрі дамыту туралы «Қорғас – Шығыс қақпасы» АЭА БК» АҚ бас директорының даму жөніндегі орынбасары Өмірзақ Бекенов айтып берді.

«Талдықорған» индустриалды аймағы қажетті инженерлік инфрақұрылымдармен толық қамтылған. Индустриалды аймақта базальт плиталарын, асфальт, синтетикалық жуу құралдарын өндіретін, өсімдік майын рафинадтап, бөтелкеге құятын 5 кәсіпорын орналасқан.

Іле ауданындағы «Боралдай» өндірістік аймағында қазіргі кезде 14 кәсіпорын жұмыс істейді, оларда 350 жұмыс орны құрылған. Тағы 4 кәсіпорынның құрылысы жүруде, 300 жұмыс орнын ашатын, инвестициясының жалпы сомасы 5 млрд. теңгеден асатын 1 кәсіпорын салу жоспарланып отыр.

Сондай-ақ «Арна» индустриалды аймағын дамыту да жалғасады. Оның аумағында Трансұлттық компанияның қатысуымен «МаревенФуд Тянь-Шань» ЖШС-ның азық-түлік өндіретін зауытын салу ірі инвестициялық жобасы жүзеге асырылды. Жобаның құны 15,4 млрд. теңге, 500-ден астам жұмыс орны ашылған. Мәселен, 2019 жылы мұндағы өнеркәсіп өндірісінің көлемі 12,0 млрд. теңгені құраған. Макарон, құрылыс материалдары шығарылып, табиғи құм өндірілген.

Іле ауданындағы «Боралдай», Қапшағай қаласындағы «Арна», Жамбыл ауданындағы «Қазыбек бек» индустриалды аймақтарында 8 мыңдай жұмыс орнымен 300-ден астам кәсіпорын орналастыруға мүмкіндік бар. 5 индустриалды аймақта инфрақұрылымды дамыту жұмыстары жүріп жатыр, «Талдықорған» индустриалды аймағында барлық инфрақұрылым толығымен дайын.

- Индустриалды аймақтарды дамытудың мүмкіндігі мол. Тек қана кәсіпкерлермен жеке-жеке жұмыс істеп, кездесулер, инвест-форумдар өткізіп, жаңа кәсіпорындар ашу ісіне тарту керек. Яғни жаңа жұмыс орындарын ашуларына мүмкіндіктер жасау керек. Бұл тікелей аудан, қала әкімдерінің жұмысы. Біз өз тарапымыздан барлық қажетті инфрақұрылыммен қамтамасыз етеміз. Қабылданған шараларға қарамастан, бұл бағытта аудан, қалалардың жұмысы баяу жүріп жатыр. Барлық жағдайы жасалған «Талдықорған» индустриалды аймағының өзін дамыту сылбыр жүруде. Облыстық кәсіпкерлік және индустриалды-инновациялық даму басқармасы, «Жетісу» ӘКК, аудан, қала әкімдері, компания басқарушылары бірлесіп жұмысты жандандырып, индустриалды аймақтарды дамытумен түбегейлі айналысулары керек. «Қорғас – Шығыс қақпасы» АЭА мен индустриалды аймақтардың экономикалық әлеуеті өте үлкен. Оны өңірді дамыту мен халықтың тұрмыс сапасын жақсартуға дұрыс пайдалана білуіміз керек, - деп А. Баталов осы салаға жетекшілік ететін өз орынбасары Серік Тұрдалиевке, және тиісті басқармалар мен департаменттерге тапсырма берді.

Кездесу соңында облыс әкіміне индустриалды аймақтар аумағында орналастыруға қатысты ағымдағы мәселелерді шешу үшін әкімшілік-тұрмыстық кешендер жобасы ұсынылды. 

• 23.02.2021
• 242