Облыс әкімі Асайын Байханов АҚШ-тың Қазақстандағы елшісі Дэниел Розенблюммен кездесті

Кездесу барысында өңір басшысы Асайын Байханов Павлодар Ертіс өңірінің ерекшеліктерін айтып, өңірдің экономикалық әлеуеті мен инвестициялық мүмкіндіктерімен бөлісті.

Өз кезегінде Дэниел Розенблюм Қазақстанның стратегиялық маңызды және дамыған өңірлерінің бірі - Павлодар облысына алғаш келіп отырғанын жеткізіп, облыстың экономикалық және өнеркәсіптік әлеуетін атап өтті.

Ккздесу барысында жан-жақты әңгіме мен пікір алмасу болды. Дэниел Розенблюм мырза азаматтық қоғамның дамуына, денсаулық сақтау мәселелеріне, халықаралық ынтымақтастық аясында жәрдемдесуге болатын мәселелердің бар-жоғына қызығушылық танытты.

Асайын Байханов Павлодар қаласының ЖИТС орталығына жабдықтарды жеткізуге, жасанды интеллектті дамыту бойынша білім беру жобаларын кеңейтуге көмектескені үшін алғысын білдірді. АҚШ-тың жетекші емханаларында павлодарлық дәрігерлердің біліктілігін арттыруға және тәжірибе алмасуға жәрдемдесу қажеттігіне ерекше назар аударды.

Сондай-ақ, өңір басшысы экономикалық ынтымақтастықтан басқа, АҚШ-тың дипломатиялық миссиясымен - American Corner Pavlodar және Makerspace серіктестік бағдарламалары жұмыс істейтінін атап өтті.

Кездесу соңында АҚШ елшісіне жергілікті суретшінің суреті сыйға тартылды.

Өзінің танысу сапары барысында АҚШ-тың төтенше және өкілетті елшісі Павлодардағы Бұқар Жырау атындағы әдебиет және өнер мұражайына, С. Торайғыров атындағы облыстық кітапханаға барады. Кетер алдында Мәшһүр Жүсіп мешітіне барады.

• 13.01.2025
• 58