Өңір басшысы Асайын Байханов жұмыс сапарымен Ақсу қаласының ауылдық аймақтарына барды

Бірінші кезекте Спутник станциясында болып, ауыл тұрғындарымен кездесті. Жақында болған халықпен есеп беру кездесуінде «Теміржолсу-Павлодар» ЖШС су құбыры желілерінен келетін судың сапасы мәселесі көтерілген болатын. Қазір ауыл тұрғындары таза ауыз суды 2 контейнерлік блок-модульден алады.

⠀Сондай-ақ, ауыл тұрғындары облыс орталығына жақын болғанына қарамастан, автобустарда жол жүру ақысының қымбатшылығына шағымданды.

⠀Асайын Байханов бұл мәселені бақылауға алуды тапсырды.

Өткен жазда ауыл көшелерінде 2,5 км жарықтандыру желісі жүргізіліп, 90 шам орнатылды. Биылғы жылы Спутниктің кіреберіс жолына асфальт төселіп, жаңа балалар ойын алаңы орнатылады.

⠀Сонымен қатар, өңір басшысы жергілікті медициналық пункттің жұмысын тексерді және қосымша қаржыландыру есебінен заманауи медициналық жабдықтармен жабдықтауды тапсырды. Осы жерде Ақсу қалалық емханасының да мәселесі талқыланды. Онда ем алушыларға ыңғайлы болу үшін жеке тұрған ғимараттарды ортақ галереямен қосу қажеттілігі бар.

Асайын Байханов бұл жобаны қолдады.

- Біз көктемде қаражат бөлеміз. Сіздер жобаны уақытында жүзеге асыруларыңыз керек, - деді облыс әкімі.

⠀Сапар барысында облыс әкімі 2025-2026 жылдар аралығында Қалқаман кентінде іске асыру жоспарланған «Май-экстракция зауытының құрылысы» инвестициялық жобасымен танысты. Жобаның құны 2,9 млрд теңге. Экспортқа бағдарланған май зауытының қуаты - жылына 33 мың тонна. Нысанның құрылысы 9,881 га алаңда жұмыс істеп тұрған элеватордың аумағында жоспарлануда.

Өңір басшысы жобаны қолдап, инвестордың жобаны сапалы іске асыруына қолдау көрсетуді тапсырды.

⠀Осы кентте өңір басшысы құны 1,5 млрд теңге болатын «Шұлық бұйымдарын өндіру» инвестициялық жобасына қолдау білдірді. Бұл жоба 300 жұмыс орнын ашуға мүмкіндік береді. Зауыттың қуаттылығы - жылына 15 миллион жұп шұлық және 30 миллион жұп шұлыққа дейін ұлғайту мүмкіндігі бар. Инвестор еуропалық сапасы мен элиталық дизайны бар 200 түрлі өнім шығаруға кепілдік беріп отыр.

⠀Жобаны жүзеге асыру үшін қосымша 1 МВт электр энергиясы қажет. Асайын Байханов өзінің бірінші орынбасары Серік Батырғұжиновке бұл мәселені шешуді тапсырды.

⠀- Бұған дейін сіздер зауытты Атамекен ауылында ашуды жоспарлаған болатынсыздар. Менің өтінішім бойынша Қалқаман ауылын таңдадыңыздар. Мұнда халық жеткілікті, алайда, жұмыс орындары жоқ. Егер сіздер өз өндірістеріңізді ашсаңыздар, біз бюджет есебінен Қалқамандағы бір-екі бос көпқабатты үйді жөндей аламыз. Осылайша, біз болашақ зауыт қызметкерлерін тұрғын үймен қамтамасыз ете аламыз және мұны іске асыруға дайынбыз. Ауыл тұрғындарының игілігі үшін мемлекет пен жеке сектордың күш-жігерін біріктіре аламыз деп сенемін, - деді Асайын Байханов.

⠀Өңір басшысы Қалқаманның кезінде ірі елді мекендердің бірі болғанын және география тұрғысынан да, логистикалық әлеуеті жағынан да болашағы бар ауыл болып қала беретінін атап өтті.

⠀

• 13.01.2025
• 20