Әкімдіктің кеңейтілген отырысында ӘЭД, бюджеттің атқарылуы және экономикалық өсімді қамтамасыз ету бойынша меморандумдар қорытындыланды

Өңір үшін өткен жыл нәтижелі болды - 2024 жыл барлық базалық макро көрсеткіштер бойынша оң динамикамен аяқталды. Өңдеу секторының жоғары динамикасы есебінен 3,4 трлн теңгеге өнім өндірілді - 9,5%.

Өңір экономикасына 1 трлн теңгеден астам инвестиция тартылды. Өсу қарқыны - 138,3% құрады. 29 мыңнан астам жаңа жұмыс орны құрылды.

Инженерлік-коммуналдық және көлік инфрақұрылымын жаңғырту бойынша ауқымды жұмыстар жүргізілді. Барлық әлеуметтік міндеттемелер толық көлемде орындалды. 40-тан астам жаңа әлеуметтік нысан ашылды.

Асайын Байханов барлық макро көрсеткіштер бойынша өңірдің белгіленген мақсаттарға қол жеткізгенін атап өтті.

- Бұл - біздің ортақ нәтижеміз. Ағымдағы жылға арналған барлық жоспарлар бекітілді, сондықтан салалық басқармаларға ай сайын болжамды есептеп, жыл басынан бастап макрокөрсеткіштердің орындалуын қамтамасыз етуді тапсырамын, - деді өңір басшысы.

Сондай-ақ, жиналыста экономикалық өсімді 6% деңгейінде қамтамасыз ету жөніндегі меморандумдардың орындалуы қаралды.

Жыл қорытындысы бойынша меморандумдар толық көлемде Павлодар мен Екібастұз қалаларында және Шарбақты ауданында орындалғаны атап өтілді.

Өңір басшысы Павлодар қаласы мен Железин ауданының әкімдерін тыңдады. Оларда барлық көрсеткіштерге қол жеткізіліп, меморандумдар толығымен орындалды.

- Бұл жұмыстарды тиісті және жоғары деңгейде ұйымдастырудың көрінісі, - деп атап өтті облыс әкімі.

2024 жылға арналған бюджеттің атқарылуы туралы қаржы басқармасының басшысы Жеңіс Шақатов баяндады. Облыс бюджетінің кірісі 369,9 млрд теңгені құрады. Өткен жылмен салыстырғанда кірістердің өсу қарқыны 46,6 млрд теңгені немесе 114,4% құрады. 600,8 млрд теңгеге жоспарланған облыс бюджетінің шығындары  597,7 млрд теңгеге игерілді - 99,5%.

Сонымен қатар, Асайын Байханов денсаулық сақтау басқармасында 282,8 млн. теңгенің игерілмегеніне назар аударды. Аумақтар бойынша кірістер жоспарын Ақтоғай, Тереңкөл аудандары және Ақсу орындамаған.

Салалар бойынша көрсеткіштердің орындалмауына және бөлінген бюджет қаражатын уақытында игермеуіне байланысты Ақтоғай, Аққулы және Тереңкөл аудандарының әкімдеріне өңір басшысы сөгіс жариялады.

- Көрсеткіштерді орындамаған немесе бюджет қаражатын игермеген қалалар мен аудандардың әкімдеріне бонустық трансферт қаражатын қысқартып, бюджет дұрыс және толық игерілетін аудандарға жіберуді тапсырамын. Әрбір басқарма басшысының, қалалар мен аудан әкімдерінің жұмысы нақты нәтижелермен, сондай-ақ, халықтың жұмысқа қанағаттану деңгейімен бағаланатын болады, - деп атап өтті Асайын Байханов.

Экономика және бюджеттік жоспарлау басқармасына салалық басқармалармен бірлесіп айдың соңына дейін ағымдағы жылға арналған меморандум жобаларын енгізу тапсырылды. Қалалар мен аудан әкімдеріне: биылғы жылы оң динамиканы қамтамасыз ету бойынша жұмыстарды күшейту, инвестициялық жобалардың, күрделі жөндеулердің іске асырылуын ерекше бақылауға алу тапсырылды. Қаржы басқармасына: облыс бюджетінің атқарылу мәселелерін тұрақты бақылауда ұстауды тапсырды.

Сондай-ақ, Асайын Байханов 31 қаңтар күні облыстық «Ертіс» телеарнасы мен «Halyk» радиосының тікелей эфирінде өңірді дамытудың негізгі бағыттары мен осы жылға арналған перспективалық жобалар бойынша тұрғындар алдында есеп беретінін айтты.

• 20.01.2025
• 52