Достық үйінде жаңа құрамдағы Қоғамдық кеңестің отырысы өтті

Облыс әкімі Асайын Байханов бұған дейін болған құрамға атқарған жұмыстары үшін алғысын білдірді. Облыс әкімі өңірдің дамуына қосқан елеулі үлесі үшін Нұрлан Нәбиевке «Облысқа сіңірген еңбегі үшін» төсбелгісін табыстады.

Кеңестің жаңа төрағасы болып Бәкір Демеуов сайланды. Қоғамдық кеңестің жаңа құрамына жастар, кәсіпкерлер, экологтар, аграршылар, заңгерлер, дәрігерлер, қоғам қайраткерлері кірді.

Өңір басшысы бірлесіп жұмыс атқаратын бағыттарды белгіледі.

- Павлодар облысының халқы бізден олардың әл-ауқаты мен өмір сүру деңгейін жақсарту бойынша шешімді шаралар қабылдауды күтуде. Биылғы жылы біз жоспарлаған жаңа бастамалардың қатарында: Ақсу қаласындағы және Успен, Ертіс, Көктөбе аудан орталықтарындағы бассейндердің құрылысы, «Жайлы мектеп» ұлттық жобасы аясында Павлодарда 1.800 орындық екі мектептің құрылысы, Павлодар ауданының Бірлік және Аққулы ауданының Тілектес ауылдарындағы апатты жағдайдағы мектептердің орнына 2 жаңа мектептің құрылысы, сондай-ақ, облыс орталығында мұз сарайы мен көркем гимнастика орталығының құрылысын бастау, Ертіс өзені арқылы өтетін жаяу жүргіншілер көпірі, Екібастұздағы инклюзивті балабақша бар. Сонымен қатар, 22 млрд теңгеден астам сомаға инженерлік-коммуникациялық желілерді қайта жаңарту және 61 әлеуметтік нысанды күрделі жөндеу жұмыстары жалғасады, - деді облыс әкімі.

Барлық деңгейдегі әкімдердің тұрақты кездесулері мен жеке қабылдаулары кезінде тұрғындардың көтерген түйткілді мәселелерін шешу мақсатында облыс әкімдігімен өңірдің 67 ауылында 96 жобаны іске асыру үшін жалпы сомасы 5,5 млрд теңге бонустық трансферт бөлінді.

Өңір басшысы ел Президентінің 2025 жылды жұмысшы мамандықтар жылы деп жариялағанына ерекше назар аударды.

Биылғы жылы Екібастұзда инвестиция көлемі 92 млрд теңгені құрайтын, 800 жұмыс орны құрылатын «Ekibastuz Ferro Alloys» және инвестиция көлемі шамамен 120 млрд теңгені құрайтын, 530 жұмыс орны ашылатын «Mineral Product International» 2 жаңа ферроқорытпа өндіру зауыттарын, сондай-ақ, Еуразиялық механикалық зауытын ашу жоспарлануда.

Павлодар АЭА аумағында инвестиция көлемі 500 млрд теңгеден асатын, жылына 15 тонна 599 сынама алтын ала отырып, құрамында алтыны бар концентратты қайта өңдеу бойынша ірі жоба іске асырылуда.

Сондай-ақ, әкім Ұлы Жеңістің 80 жылдығын, Қазақстан Республикасы Конституциясы мен Ассамблеясының 30 жылдығын, сондай-ақ, Қазақ хандығының 560 жылдығына, Жаяу Мұсаның 190 жылдығына, Абай Құнанбаевтың 180 жылдығына, Майра Шамсутдинованың 135 жылдығына, Иса Байзақовтың 125 жылдығына, Қалмұқан Исабаевтың 100 жылдығына және Махмет Қайырбаевтың 100 жылдығына арналған іс-шараларды өткізуге кеңестің белсенді қатысуының маңыздылығын атап өтті.

Соңында Асайын Байханов жаңа құрам тұрғындарды толғандыратын ең өзекті мәселелерді анықтап, азаматтық диалог аясында шешім табатынына сенім білдірді.

Павлодар облысының Құрметті азаматы Бақыт Бексейітова сенім білдіргені үшін алғысын білдіріп, Қоғамдық кеңес қойылған міндеттерді орындау үшін бар күшін, білімі мен тәжірибесін жұмсайтынын жеткізді.

• 20.01.2025
• 54