Көктем жақындап қалды.

Көктем жақындап қалды. Демек, облыс орталығының ирригациялық жүйелері дайын болуы тиіс. Осыған орай, жаңа маусымға дайындық мәселелері бойынша менің төрағалығыммен кеңес өтіп, онда бірқатар жайттар сараладық.

Өткен жылы облыс орталығының ирригация мәселелерімен айналысатын арнайы жұмыс тобы құрылған болатын. Мен бұл жүйелерді дамыту жөнінде бірқатар тапсырмалар жүктегенмін.

Бүгінде облыс орталығында ұзындығы 82,5 шақырым болатын сегіз канал бар. Ал ирригациялық арықтардың жалпы ұзындығы 164 шақырымды құрайды. Оның ішінде 122,3 шақырымы лотоксыз арықтар десек, олардың 63,6 шақырымы жөндеуді қажет етеді. Сондай-ақ, лотокпен қамтылған 41,7 шақырым арықтардың 20,4 шақырымы да жөндеуге жатады. Ағымдағы жылы 50 шақырым лоток желісін орнату және жөндеу жоспарлануда, ал 2022 жылы 30 шақырым лоток желісі ауыстырылатын болады.

Өткен жылы қалалық ирригациялық жүйелерді тазалауға жергілікті бюджеттен 150 миллион теңге бөлінген. Жұмыстармен «Тараз-Ирригация» ЖШС айналысқан болатын. Биыл бұл мақсатқа 90 миллион теңге қажет.

Бұдан бөлек, каналдардың өзін абаттандыру жоспарлануда. Олардың бойында демалыс аймақтары салынатын болады. Сәулет және қала құрылысы басқармасымен бірге болашақ нысандардың эскиздері дайындалған. Мәселен, Қарасу-2 каналында салынатын демалыс аймағының ауданы 16,5 мың шаршы шақырымды құрайды, ал Үшбұлақ каналындағы 29,5 мың шаршы шақырым жер абаттандырылатын болады.

Жиын қорытындысымен,жұмыс тобына айдың соңына дейін каналдар мен арықтардың жай-күйі туралы есеп беруді тапсырдым.

• 26.02.2021
• 318