Құрметті сарбаздар мен сержанттар, офицерлер мен генералдар! Қымбатты отандастар!

Бүгін маңызды әрі айтулы мереке – Алғыс айту күнін атап өтудеміз! Бұл мереке елімізде тұратын түрлі этникалық топтар арасындағы достық пен өзара түсіністікті білдіреді. Бұл күн қоғамымыздың негізгі құндылықтары болып табылатын бірлікті, ынтымақтастықты және өзара көмекті айшықтайды.

Алғыс айту күні – еліміздің дамуына үлес қосқан, әркез қолдау мен жәрдем көрсеткен, өзара ынтымақ пен ізгілік дәстүрлерімізді қалыптастырып, нығайтуға атсалысқан барша адамға ризашылық білдіру мүмкіндігі. Бұл – әр түрлі ұлт өкілдері мен олардың мәдениетін біріктіретін, көпұлтты қоғамдағы бірлік пен келісімнің маңыздылығын еске салатын мереке.

Бүгін біз қиын-қыстау кезеңдерде батылдық пен тектілік танытқандарды ерекше еске аламыз. Бейбітшілік пен келісімде өмір сүрген ата-бабаларымызды еске алып, олардың ісін жалғастырып, қуатты әрі көркейген Қазақстанды құрудамыз.

Бұл күні мен барлық әскери қызметшілер мен азаматтық персоналға, Қарулы Күштердің ардагерлеріне ерен еңбектері, Отанға адал қызмет етіп, бәрімізге ортақ құндылықтарды қолдауға және қорғауға әркез дайын болғандығы үшін алғыс айтқым келеді. Қарулы күштеріміз мемлекетіміздің қауіпсіздігі мен тұрақтылығын нығайтуда аса маңызды рөл атқарады.

Мереке құтты болсын, қымбатты отандастар!

Аспанымыз ашық, ел іші берекелі болып, ырыс-ынтымағымыз арта берсін!

Құрметпен,

Қазақстан Республикасының Қорғаныс министрі

генерал-полковник Р. Жақсылықов

• 01.03.2025
• 51