Oблыс әкімі Асайын Байханов Сенаттың «Еңбек адамы - ұлттық экономиканың өсуі мен ұлттың өркендеуінің негізі» тақырыбында өткен парламенттік тыңдауында баяндама жасады

Өңір басшысы Павлодар облысы еліміздегі өңдеу өнеркәсібі бойынша үздік үштікке кіретінін, сондай-ақ, шикізаттық емес экспорт көлемі бойынша 4-ші орында екенін атап өтті. Сонымен қатар, инвестициялардың өсу қарқыны бойынша республикада 3-орында, ал аграрлық сала бойынша - өңірлер арасында көшбасшылар қатарында.

- Өңірдегі экономикалық белсенді 405 мың тұрғынның әрбір бесіншісі өнеркәсіпте еңбек етеді. Ал 3,5 трлн теңгеге 84 жоба іске асырылғаннан кейін 12,5 мыңнан астам жаңа жұмыс орны құрылады. Бүгінде өңір өндірісіне 1 мыңға жуық жұмысшы қажет, - деді Асайын Байханов.

Өндірістік қуаттылықты белсенді арттыру еңбек ресурстарын да ұлғайтуды талап етеді. Кәсіби дағдылар мен құзыреттерге қойылатын талаптардың тез өзгеруіне байланысты біліктілік теңгерімсіздігі бар. Көп жағдайда үміткерлерде технологиялық білім мен дағдылар жеткіліксіз болады. Инвесторлар мұны тәлімгерлік және жұмысшыларды қажетті деңгейге дейін жеткізу бағдарламаларымен шешуде.

Жаңа кәсіпорындарды кадрлармен қамтамасыз ету экономика мүддесі үшін бірегей білім беру жүйесін құруды талап етеді.

Облыс әкімі техникалық және кәсіптік білім беруді трансформациялауға, өңірде сертификатталған мамандар даярлауға жан-жақты тоқталып өтті.

Биылғы жылы жұмысшы мамандықтар бойынша 1 230 түлек оқуын аяқтап, жұмысқа орналасады. «Өңірлік кәсіптер атласы» жобасы аясында енгізілген жаңа мамандықтармен 8000 жуық студент қамтылды.

Өңір басшысы кадр тапшылығы мәселесін қажетті жұмысшы мамандықтарға мамандарды оқытуды ұлғайту және олардың беделін арттыру арқылы шешу қажеттігін атап өтті.

Жұмысшы мамандықтардың тапшылығын шешу үшін білім алушылар санын 30%-ға арттыру жоспарлануда. Студенттер мен педагогтердің гранттары мен сыйлық ақысына, стипендияларына, тағылымдамалардан өтуіне 1,5 млрд теңге бағытталады. Жеке сектордан қосымша ынталандыру шаралары қабылданды.

• 03.03.2025
• 32