Облыс әкімі Асайын Байханов 8 наурыз мерекесіне орай әйелдер қауымымен мерекелік кездесу өткізді.

Салтанатты шараға кран жүргізушілерінен бастап электр слесарлары, машинистер мен термистерге дейін түрлі салада жұмыс істейтін әйелдер қауымының өкілдері қатысты.

Облыс әкімі павлодарлық әйелдер қауымының еңбек нарығына етене араласып, жемісті еңбек етіп, жүктелген барлық міндеттерді абыроймен атқарып жатқандарына алғысын білдірді.

- Сіздер ауыр құралдар мен көліктерді басқарасыздар, өңіріміздің индустриялық салаларын дамытуға үлес қосудасыздар, сонымен бірге отбасының ұйытқысы, сүйікті жар, аяулы анасыздар, - деп атап өтті өңір басшысы.

Асайын Байханов өндірісте ер адамдармен тең дәрежеде жұмыс істейтін әйелдерге мемлекет әрдайым қажетті қолдау көрсететінін атап өтті.

Өз кезегінде «ERG Service» электр слесары Нағима Жүнісқалиева мен «ҚЭЗ» АҚ зертханашысы Марина Шнайдер сөз сөйледі. Энергетика саласының ардагері, Ақсу қаласының Құрметті азаматы Татьяна Носачева өңір басшысына жылы қабылдауы үшін алғысын білдірді.

Мерекелік кездесуді музыкалық нөмірлер мен көктемгі гүл шоқтары әрледі.

• 11.03.2025
• 22