Жамбыл облысында бірқатар әйел-аналар марапатталды

8 наурыз – Халықаралық әйелдер күні мерекесіне орай К. Әзірбаев атындағы Жамбыл облыстық филормониясының «Баласағұн» орталық концерт залында салтанатты жиын өтті.

​Мерекелік шарада облыс әкімі Ербол Қарашөкеев әйелдер қауымын мерекесімен құттықтады.

​- Әйел бақыты – ана, елге тұтқа, ұрпаққа пана болу.

​Бүгінде шежіресі мол, жарасымды дәстүрі жалғасқан өңірімізде 47 мыңнан астам көпбалалы ана бар. Олардың 5 768-і «Алтын алқа», 11 683-і «Күміс алқа» иегері.

​Ұлағатты ұрпақ тәрбиелеп отырған аналарымызға мемлекет тарапынан қолдау шаралары тұрақты негізде жүргізілуде.

Батыр аналарымыздың арқасында өткен жылы 23 049 бала дүние есігін ашты, – деген облыс әкімі қызметпен қатар отбасының ұйытқысы, шаңырағының шырағына айналып отырған барша жамбылдық аналарға алғысын жаударды.

​Бұдан соң өңірдің әлеуметтік-экономикалық дамуына қосқан үлесі үшін әйел азаматтарына сый-құрмет көрсетілді.

​Атап айтқанда, М.Х. Дулати атындағы Тараз университетінің профессоры Күлжәмила Жолдасова «Парасат» орденімен, білім саласының ардагері Сара Молдашбаева, «Sapa education» балалар оқыту орталығының директоры Күнсая Әмірова, жеке кәсіпкер Рамиля Жаманақова, № 2 облыстық мамандандырылған балалар-жасөспірімдер спорт мектебінің бокстан жаттықтырушысы Әйгерім Сәттібаева «Ерен еңбегі үшін» медалімен наградталды.

​Сонымен бірге «Облысқа сіңірген еңбегі үшін» белгісі, облыс әкімінің Құрмет грамотасы мен Алғыс хаты және өзге де марапаттар табысталды.

​Шара соңы өнерпаздардың концерттік бағдарламасына ұласты.

• 11.03.2025
• 44