Облыс әкімі Асайын Байханов қала ішінен өнеркәсіптік ауданға көшіп, орналасқан жерін өзгерткен «№1 автобус паркі» ЖШС-де болып қайтты

1957 жылы негізі қаланған кәсіпорынның 2023 жылы иесі ауысып, жаңа меншік иесі 2 жылдың ішінде тасымалдау сапасын жақсарту үшін автопарк пен оның инфрақұрылымын жаңартуға шамамен 10 млрд теңге инвестиция салды.

Компания өкілдері аймақ басшысына жаңартылған автобус паркін көрсетіп, жүргізушінің face id арқылы кәсіпорынға кіруінен бастап маршрутқа шығуына дейінгі толық жұмыс циклі туралы баяндады.

Асайын Байханов диспетчерлік және медициналық кабинеттің жұмысымен танысты. Сондай-ақ, күн сайын 4-5 санаттағы механиктер мен слесарлар бригадасы жұмыс істейтін жөндеу аймағында болды. Кәсіпорында заманауи автоматтандырылған жуу және май ауыстыру, кең бокстар, өзінің жанармай құю бекеті жабдықталған, жүргізушілер үшін демалатын, тамақ ішетін, киім ауыстыратын, жуынатын, кір жуатын және т. б. бөлмелер қарастырылған.

Бүгінгі таңда кәсіпорынның 20 автобус бағытында 260 жүргізуші жұмыс істейді, ал автопаркте 2023-2024 жылдары шығарылған 130 автобус және 2019 жылғы 30 автобус бар.

- Мен әлеуметтік маңызы бар жолаушылар тасымалына бағытталған субсидиялардың бизнестен кетпей, кәсіпорынды дамыту үшін қайта инвестицияланғанына қуаныштымын, - деп атап өтті облыс әкімі.

Құрылтайшының айтуынша, автопарк қала сыртына көшуден ұтты, өйткені бұрын қала тұрғындарынан үйлердің аумағында автобустардың жиналуына, таңертең және кешкі уақыттарда автобустардан шығатын газдар мен шуларға қатысты шағымдар жиі болатын.

- Жаңа база бұрынғыдан екі есе үлкен. Біз мамандандырылған автопаркті жоспарлап, іске асырдық. 2025 жылдың жоспарында қосымша 20 бірлік автобус сатып алу, шатырды, кіру тобын ауыстыру, 2-3 қабатты жөндеу, аумақты асфальттау, қызметкерлеріміз үшін барынша қолайлы жағдай жасау, - деді №1 автопарктің құрылтайшысы Ризван Цинаев.

• 13.03.2025
• 39