«Астана Опера» театры елордалық дәрігерлерге арнап «Евгений Онегин» операсын сахналады

«Астана Опера» мемлекеттік опера және балет театры 1 наурыз Алғыс айту күніне орай Мәдениет және спорт министрлігі және Нұр-Сұлтан қаласының әкімдігі бірлесіп, елордалық дәрігерлерге арнап П.Чайковскийдің «Евгений Онегин» операсын сахналады.

Театр ұжымы осынау күрделі кезеңде еңбегімен ерлік жасап жүрген дәрігерлерге алғыс білдіріп, елдің еңсесін тіктеуге үлес қосып жүрген жандарға құрмет көрсетті. Сонымен қатар медицина мекемесі қызметкерлерінің күнделікті күйбең тірліктен тынығып, әлемдік классиканың жауһары «Евгений Онегин» қойылымын тамашалау арқылы асқақ өнерге бір табан жақындай түсуге шақырды.

Кеште сөз алған Мәдениет және спорт министрі Ақтоты Райымқұлова Алғыс айту күнімен құттықтап, қоғамда дәрігерлер рөлі лайым жоғары тұратынын атап өтті.

«Мемлекеттің басты байлығы адам десек, әрбіріміздің аман-саулығымызды бақылайтын ол әрине, ақ халатты абзал жандар. Дәрігер деген – ең ұлы әрі қастерлі мамандық. Бүгінде әлем жұртшылығы осынау маңызды мамандық иелерінің көмегіне мұқтаж болып, соларға сенім артып отыр. Бүкіл әлем халқының үрейін алған пандемиядан халқымыздың денсаулығын сақтау үшін тынымсыз еңбек етіп, медициналық көмек көрсеткен ақ халатты абзал жандарға алғысымды білдіремін.

Бүгін «Астана Опера» театры ҚР Мәдениет және спорт министрлігі және Нұр-Сұлтан қаласының әкімдігімен бірлесіп, Сіздерге арнап қайырымдылық акциясын өткізіп отыр.

Алғыс айту - ел басына күн туған сындарлы шақта бар мехнатты бірге еңсеріп, ғасырлар бойы сарыла күткен Тəуелсіздік таңының рауандауына тірек болған мызғымас ынтымағымызды ұлықтайтын күн. Көктемнің алғашқы таңымен бастау алатын мереке кезінде байтақ отанымыздағы этнос өкілдері қаранар қазақ халқына ілтипат көрсетіп, ортақ тарихқа тағзым етеді.

Денсаулық тек жеке адамның ғана емес, бүкіл қоғамның байлығы. Қоғам байлығын қорғаушы - барша медицина қызметкеріне алғысымды білдіргім келеді. Сіздердей ақ халатты патриот- азаматтардың арқасында еліміз еңсесі биік, іргесі берік, дамыған мемлекеттердің қатарынан көрінері сөзсіз»,-деді министр.

Операға «Астана Опера» солистері, оркестрі, хоры, балеті, мимансы және балалар студиясы қатысты. Қоюшы дирижер – театрдың бас дирижері, Қазақстанның еңбек сіңірген қайраткері, ҚР Мемлекеттік сыйлығының лауреаты Алан Бөрібаев. Бас хормейстер – Қазақстанның еңбек сіңірген қайраткері - Ержан Дәуітов, қоюшы хореограф – Елена Шерстнева.

Естеріңізге сала кетейік, П.Чайковскийдің «Евгений Онегин» спектаклінің премьерасы елордалық театр сахнасында 2019 жылдың 8-9 ақпанында өткен еді.

• 03.03.2021
• 327