Павлодар Ертіс өңірінде Ұлыстың ұлы күні - Наурыз мейрамы кең көлемде тойлануда

Әкімдіктің алдындағы орталық алаңда мерекелік іс-шаралар ұйымдастырылды. Наурыз мейрамын тойлау үшін мыңдаған қала тұрғындары мен қонақтары отбасыларымен бірге жиналды.

Ұлттық нақышта безендірілген киіз үйлер тігіліп, алтыбақандар, бүркітшілер, шабандоздар, ұлттық киімдер мен түрлі-түсті фотоаймақтар мерекенің көркін кіргізді.

Концерттік бағдарлама табиғат ананың түрленіп, жаңа күннің бастауы болып саналатын Наурыз мейрамының мәні туралы театрландырылған қойылыммен басталды. Мерекенің басты кейіпкері - Қыдыр ата келіп, жақсылыққа ниет білдіріп, ақ батасын берді.

AGUGAI тобы, Мархаба Сәби, TURAR және Мадина Сәдуақасова өнерлерін көрсетіп, мерекені одан әрі жандандыра түсті.

Сондай-ақ, облыс әкімі Асайын Байханов та мерекеге қатысып, Қимақ кезеңінің, Қазақ хандығы кезеңінің бірегей экспонаттары қойылған «Тарих куәгерлері» атты көрме тақырыбындағы киіз үйге, сондай-ақ «Даналар үні», «Бірлігіміз жарасқан», «Заманға сай - Тouch panel», «Ән еркесі - Майра» және т. б. киіз үйлерге барды.

Биыл дүбірлі думан Наурызнама онкүндігі тұжырымдамасы аясында 10 күн бойы тойлануда. Әрбір күн белгілі бір тақырыпқа арналған және терең мазмұн-мәнге ие.

Павлодар Ертіс өңірінде Наурызды мерекелеу аясында облыс көлемінде 170 киіз үй тігілді.

• 26.03.2025
• 28