Асайын Байханов 2025 жылға жоспарланған құрылыс жобаларын іске асыру және дезинсекциялық іс-шараларды өткізу мәселелері бойынша аппараттық жиналыс өткізді

Премьер-Министр Олжас Бектеновтың өңірге жасаған жұмыс сапары барысында айтылған міндеттерді шешуге ерекше назар аударылды.

- Премьер-Министр Президенттің өнеркәсіпті дамыту жөніндегі тапсырмаларының іске асырылу барысымен танысып, энергетиканы дамыту мәселелері бойынша жиналыс өткізді, сондай-ақ, кәсіпкерлермен кездесу өткізіп, экономиканың нақты секторын мемлекеттік қолдау шараларын талқылады. «Жұмысшы мамандықтары жылы» аясында түсті металлургия колледжіне барды. Әрбір нысанда Үкімет басшысы орындау мерзімімен нақты тапсырмалар берді, - деп атап өтті облыс әкімі.

Асайын Байханов бейінді басқармаларға осы тапсырмалардың орындалу барысын бақылауда ұстауды тапсырды.

Құрылыс басқармасының басшысы Асқар Ажмұрат 2025 жылға жоспарланған құрылыс жобаларын іске асыру туралы баяндама жасады.

2025 жылы жалпы сомасы 14 млрд теңгеге 42 нысанның құрылысы жоспарланған. Соның ішінде биыл 1765 пәтерге арналған ауданы 121,6 мың шаршы метрді құрайтын 11 көппәтерлі тұрғын үйдің құрылысы жүргізілуде, оның ішінде: Павлодарда - 7 үй, Екібастұзда - 3, Ақсуда - 1 үй. Сондай-ақ, 3 млрд теңге қаражатқа жалға берілетін әлеуметтік тұрғын үйге арналған 217 пәтер сатып алу жоспарлануда.

«Ауылдық денсаулық сақтауды жаңғырту» ұлттық жобасы аясында Бәйет, Ивановка, Үштерек, Ленино, Құркөл, Мыңкөл ауылдарында 6 медициналық нысан аяқталады.

«Жайлы мектеп» ұлттық жобасы бойынша Павлодар қаласында 2 мектептің құрылысы жүргізілуде. Сәуір айында «Достық» шағын ауданындағы мектептің құрылысы аяқталады. Гагарин көшесінің бойында салынып жатқан №47 мектептің еденін монтаждау жұмыстары жүргізілуде. Нысанды ағымдағы жылдың тамыз айында тапсыру жоспарланған. Сондай-ақ, жаздың соңына дейін №34 мектепке жапсарлай салынып жатқан қосымша ғимараттың да құрылысы аяқталады.

Аққулы ауданының Тілектес ауылындағы жаңа мектептің іргетасына шұңқыр дайындау жұмыстары орындалды. Биыл Павлодар ауданының Бірлік ауылында және Ертіс ауданының Қызылқақ ауылында мектептердің құрылысы басталады.

Сонымен қатар, облыстың ауылдарында 6 денешынықтыру-сауықтыру кешенін, 3 бассейн және 1 спорт кешенін салу жоспарлануда.

Талқылаудың қорытындысы бойынша Асайын Байханов құрылыстардың нормативтік мерзімдерін бақылауда ұстауды және мердігер ұйымдар тарапынан шарттық міндеттемелердің талаптары бұзылған жағдайда уақтылы талап-арыз жұмыстарын жүргізуді, бюджет қаражатын толық және уақтылы игеру бойынша барлық шараларды қабылдауды тапсырды.

Дезинсекциялық іс-шараларды өткізу бойынша жер қойнауын пайдалану, қоршаған орта және су ресурстары басқармасының басшысы Сағын Төлеутаев баяндады.

Сәуір айының басынан бастап ғылыми сүйемелдеу қызметкерлері шыбын-шіркейдің даму кезеңдерін фенологиялық бақылауды бастайды.

Әуеден өңделетін алқаптың жалпы көлемі 172 мың га құрайды, бұл өткен жылмен салыстырғанда 45 мың га артық. Бұл жұмыстарға 10 бірлік АН-2 ұшағы жұмылдырылады, аэрозольді реттелетін дисперсия генераторларының санын көбейтеді.

Жалпы ұзындығы 1800 км Ертіс өзені мен оның арнасын өңдеу жұмыстары жалғасады.

Бұл өңдеу жұмыстары 3 мәрте 10 нүктеде жүзеге асырылады.

Облыс орталығының жағалауын, Усолка бөгетін және шаңғы базасын қоса алғанда, жағалау бойында орналасқан 60 елді мекенді күнделікті негізде тосқауылмен өңдеу соңғы кезең болады.

Қазгидрометтің алдын ала болжамы бойынша Шығыс Қазақстан және Абай облыстарының аумағында 2025 жылдың сәуір айы жылы және жауын-шашынды болады деп күтілуде.

Осыған байланысты бассейндік инспекциямен бірлесіп жіберілетін судың көлемі пысықталып, кестесі әзірленді. Оған сәйкес жіберілетін судың жалпы көлемі - 7 км3 (3500 м3/сек - 11 тәулік бойы) шегінде болады. 8 сәуірде басталып, негізгі кезеңі 13 сәуірден 2 мамырға дейін 20 тәулікке жоспарланған. Жіберілетін судың бұл көлемі жайылма алқабының шамамен 85% басады деп болжануда.

• 07.04.2025
• 38