Облыс әкімі Асайын Байханов жұмыс сапарымен Ақсу қаласына барып қайтты

«Қазхром ТҰК» АҚ АЗФ басшылығымен өткен жиналыста жылыту маусымының қорытындысы шығарылып, алдағы қысқы кезеңге дайындық мақсатында Ақсудың «РОК-2» қазандығына ауқымды жөндеу науқанын жүргізу мәселелері жан-жақты талқыланды. Қазандық пен желілік жабдықты күрделі жөндеуге және реконструкциялауға, сондай-ақ, «РОК-2» басты жылу магистралін жаңартуға ERG тобы 3 млрд теңгеден астам қаражат бөлді.

Сонымен қатар, Ақсу қаласының әкімі келесі аптада жылу желілеріне жүргізілетін гидравликалық сынақтарға дайындық барысы туралы баяндады.

Жұмыс сапары барысында Асайын Байханов Жаяу Мұса атындағы Ақсу жоғары көпсалалы колледжінде болып, «WorldSkills Kazakhstan-2024» Ұлттық чемпионатының жүлдегерлерін құттықтады.

Одан кейін өңір басшысы облыстық бюджет қаражаты есебінен салынған Мұз аренасына барды. Қазіргі уақытта жаңа спорт кешенінде 150 бала қысқы спорт түрлерімен айналысады. Аймақ басшысы облыстың спорт басқармасы мен қала әкімдігі басшылығының алдына ағымдағы жылдың соңына қарай спортпен шұғылданатын балалардың санын 300-ге дейін жеткізу міндетін қойды.

Егжей-тегжейлі талдау жасалған келесі нысан Ақсу қаласының басты су тазарту ғимараты болды. Мұнда облыс әкімінің тапсырмасы бойынша өткен жылы резервтік электр беру желісінің құрылысы басталған болатын. Өйткені, аталмыш резервтік электр желісінің болмауына байланысты қала тұрғындары электр желілерінде орын алатын апаттық жағдайлар кезінде сумен жабдықтауда қиындықтарға тап болды.

Бүгінде ұзындығы 6,3 км болатын резервтік электр беру желісі толығымен салынды, енді «Ақсу су арнасы» МКК-ға мердігер ұйыммен бірлесіп екі апта мерзімде резервтік тармақты қосу және сынақ өткізу міндеті қойылды.

Сапар барысында Асайын Байхановқа Ақсу қаласының негізгі көлік артериясын жөндеу жұмыстарының барысы баяндалды. «ГорДорСтрой» ЖШС мердігер ұйымы 12 км жолды фрезерлеу жұмыстарын толық орындап, асфальттауды бастады.

Облыс әкімі барлық жұмыстарды осы жылдың 25 сәуіріне дейін аяқтауды тапсырды.

Одан кейін өңір басшысы «Қызылжар-Құс KZ» ЖШС жұмысымен танысты.

Өткен жылы кәсіпорынды қалпына келтіру жұмыстары басталған болатын. Бүгінгі таңда құс фабрикасына 5 млрд теңге инвестиция салынды, оның 1,5 млрд теңгесі нысандарды қалпына келтіруге, ал қалған қаражат қарыздарды өтеуге, жабдықтар сатып алуға және айналым қаражатын толықтыруға жұмсалды.

8 сәуір күні кәсіпорында алғашқы құс сою жұмыстары жүргізілді.

Жаңадан іске қосылған кәсіпорында қазір жақын маңдағы ауылдардан 145 адам жұмыс істейді, ал толық қуатта іске қосылған кезде 250-ге дейін адамды жұмыспен қамтитын болады. Өндіріс көлемін жылына 10 мың тоннаға дейін ұлғайту жоспарлануда.

• 15.04.2025
• 30