Жаңартылған жағалаудың ашылуы

Қапшағай су қоймасының Қонаев қаласы аумағындағы жағалауы ұзақ уақыт бойы абаттандырылмаған күйде болған. Бүгінде бұл аумақ балалар мен спорт алаңдары, субұрқақтар, жайлы орындықтар және суға түсуге қолайлы баспалдақтары бар заманауи демалыс аймағына айналды. Аталған жобаның жүзеге асуына «Freedom Life» өмірді сақтандыру компаниясы үлкен қолдау көрсетті.

Абаттандыру жұмыстары 2024 жылдың жазында басталып, қалалық жағалаудың түбегейлі түрленуімен аяқталды. Жаңа брусчатка төселіп, орындықтар мен қоқыс жәшіктері орнатылды, жарықтандыру жүйесі жаңартылды. Кең балалар және спорт алаңдары, демалыс орындары мен ашық аспан астындағы жаттығу құралдары бар воркаут-аймақтар пайда болды. Жағажайға түсетін баспалдақтар мен субұрқақтар да орнатылды. 2025 жылдың наурыз айында абаттандырудың соңғы кезеңі аяқталып, гүлзарлар, қылқанжапырақты және жапырақты ағаштар отырғызылды.

Алматы облысының әкімі Марат Сұлтанғазиев бұл жобаның маңыздылығын ерекше атап өтті: «Бұл жай ғана абаттандыру емес — бұл заманауи әрі жайлы қоғамдық кеңістік құруға қосылған үлес. Қонаев қаласы мен Қапшағай жағалауы – су туризмі үшін маңызды аймақтар. Жаңартылған жағалау инфрақұрылымды жақсартып қана қоймай, өңірдің инвестициялық тартымдылығын да арттырады», — деді облыс әкімі.

Ұзындығы 1 шақырым болатын жаңартылған жағалау – бұл демалыс, серуен, спортпен айналысу мен отбасымен уақыт өткізуге арналған заманауи және жайлы қоғамдық кеңістік. Бұл бастаманы жүзеге асыру үшін «Freedom Life» ӨСК 4,53 млрд теңге көлемінде қаржылық қолдау көрсетті. Жоба бизнестің мемлекеттің мүддесі үшін табысты серіктестігінің айқын үлгісіне айналды.

«Біз бұл кеңістікті ерекше әрі заманауи ету үшін едәуір қаражат, күш пен уақыт жұмсадық. Мұнда спортпен айналысатын, кездесетін және демалатын сүйікті орынға айналатын жаңа тартылыс нүктесін көріп отырмыз. Бұл тек аумақты абаттандыру емес, Қонаев қаласының ұзақ мерзімді және тұрақты дамуына қосқан үлесіміз. Біз қаланың үлкен әлеуетіне сенеміз және мұндай жобалар оның жыл өткен сайын жайлы қалаға айналуына жол ашады», — деді Freedom Holding Corp. Бас атқарушы директоры Тимур Турлов.

Ресми бөлімнен кейін нысан коммуналдық меншікке беріліп, абаттандырылған аумақпен таныстыру экскурсиясы мен қазақстандық әртістер мен би ұжымдарының қатысуымен мерекелік концерт өтті.

«Еліміздегі ірі холдингтердің бірі ретінде біз ESG-бағытты белсенді дамытып, қалалық ортаны жайлы әрі шабыттандыратын етуге бағытталған жобаларды қолдаймыз. Freedom Life компаниясы алты жылдан астам уақыт бойы өмірді сақтандыру саласында цифрлық қызмет көрсетудің көшбасшыларының бірі бола отырып, әлеуметтік маңызға ерекше көңіл бөліп келеді. Қонаевтағы жағалауды абаттандыру — бизнестің қалалық инфрақұрылымды жақсартуға қалай үлес қоса алатынының жарқын мысалы. Бұл біз үшін жай ғана қолдау емес, бұл – қазақстандықтардың болашағы үшін жасалған саналы стратегиямыздың бір бөлігі», — деді «Freedom Life» ӨСК басқарма төрағасы Азамат Ердәсов.

Іс-шара барысында Алматы облысының әкімі Қапшағай су қоймасы экожүйесін дамыту перспективалары мен Қонаев қаласының қалалық ортасын жаңғырту, оны өңірдің басты туристік бағыттарының біріне айналдыру жоспары туралы да айтып өтті: «Алда әлі де ауқымды жұмыстар күтіп тұр. Туристер үшін қолайлы инфрақұрылым дамытылады, сондай-ақ «Ұлы дала жорығы» және өрік фестивалі сияқты ірі іс-шаралар жоспарланған. Жақын болашақта екі бес жұлдызды қонақ үй мен халықаралық деңгейдегі жағажай салу көзделуде», – деді Марат Сұлтанғазиев.

• 19.04.2025
• 16