Павлодарда Кеңес Одағының батыры Махмет Қайырбаевтың 100 жылдығына арналған конференция өтті

Достық үйінде даңқты жерлесіміздің 100 жылдық мерейтойына орай «Павлодарлықтардың Ұлы Жеңіске қосқан үлесі: Кеңес Одағының батыры Махмет Қайырбаевтың жауынгерлік жолы» тақырыбында республикалық ғылыми-тәжірибелік конференция өтті. Іс-шараға ғылыми және қоғамдық қауымдастық өкілдері, тарихшылар, ЖОО оқытушылары, сондай-ақ, Павлодар облысының әкімі Асайын Байханов қатысты.

Өңір басшысы Махмет Қайырбаевтың нағыз патриот екенін және оның өмірі мен Отанға қызмет етуі ерлік пен батылдықтың жарқын үлгісі екенін атап өтті.

- Махмет Қайырбаев - өз халқының дара туған перзенті. 18 жасында Смоленск маңындағы шайқастарға қатысқаны үшін Александр Невский орденін алды. Ал 20 жасында Шяуляй танк шайқасында көзсіз ерлік көрсетіп, Кеңес Одағының батыры атағына ие болды. Оның есімі табандылық пен Отанға деген адалдықтың символы ретінде мәңгілік ел есінде қалады - деп атап өтті Асайын Байханов.

Соғыстан кейін ардагер аймақтың дамуына елеулі үлес қосты. Ол облыстың бірнеше ауданын басқарып, индустриалды Павлодардың қалыптасуына белсенді атсалысты және жерлестері арасында жоғары беделге ие болды.

Конференцияда Қазақстан Республикасының Жазушылар Одағының мүшесі Юрий Поминов баяндама жасап, батырға «Махмет Қайырбаев биігі» очергін арнады. Сондай-ақ, зерттеуші Халел Әкімханов, әл-Фараби атындағы ҚазҰУ профессоры Аманжол Қалыш, Astana IT University оқытушысы Бақнұр Тасыбек, ҚР Ұлттық музейінің ғылыми қызметкері Серік Әбдірахманов, Toraighyrov University профессоры Аслан Азербаев және басқа да қатысушылар сөз сөйледі.

Махмет Қайырбаев туралы естеліктер Павлодар облысында сақтаулы. Қаланың орталық көшесі батырдың есімімен аталады және өзі тұрған үйге ескерткіш тақта орнатылған. Облыстық тарихи-өлкетану мұражайының экспозициясында ол басқарған батарея құрамынан жауынгерлік қару ұсынылған.

2025 жылдың басынан аймақта батырдың 100 жылдығына арналған бірқатар іс-шаралар өткізілуде. Ардагердің ұлы Мұрат Қайырбаев мерейтойға орай әкесінің жауынгерлік және өмір жолдарын баяндайтын кітап шығарды. Сондай-ақ, «Кеңес Одағының батыры Махмет Қайырбаевқа - 100 жыл» естелік медалі шығарылды.

• 21.04.2025
• 25