Балқаш көліне апаратын жолдың құрылысымен танысып, Ақсу ауданындағы құрылыс нысандарын араладым

Ақсу ауданында бірнеше құрылыс нысандарын аралап, Балқаш көліне дейінгі автожолдың қайта жаңғырту жұмыстарының барысын көріп қайттым.

Алдымен Алматы – Өскемен – Лепсі – Ақтоғай автотрассасының бойындағы құрылыс жұмыстарының қалай атқарылып жатқанынына назар аударып, жол салушы мердігер ұйым өкілдерімен тілдестім.

Атап өтсек, аталған жолдың 0-35 км толық аяқталып, пайдалануға берілген, 35-90 км учаскеде екі қабат асфальт төселіп біткен, қазір 90-104 км учаскеде асфальт төсеуге дайындық және бір қабат асфальттау жұмыстары 70-тей техниканы тарта отырып, қызу жүріп жатыр. Мердігер ұйым басшылығының  айтуынша, осы жылдың 15 маусымына дейін жол екі қабат асфальт жабынымен көлік қозғалысы үшін ашылады. Ал үшінші беткі қабатының асфальты мен абаттандырылуы жыл соңына дейін аяқталады. Жазғы туристік маусым басталғанға дейін белгіленген жұмыстарды бітіруді тапсырдым.

Ауылда салынып жатқан 60 пәтерлік үйдің құрылысымен таныстым. Осыдан бір жыл бұрын басталған құрылыс жұмыстары биылғы тамыз айының соңына дейін аяқталуы тиіс. Қазіргі дайындық деңгейі – 60 %. Сол сияқты осы үйдің инженерлік-коммуникациялық желілерін жүргізу жұмыстары осы сәуір айынан басталған. «Сапалы үйлер тек қалаларда ғана емес, ауылдық жерлерде де салынуы керек. Халыққа тұрғын үй қажет, баспана беру - тұрғындардың өмір сүру сапасын арттырудың маңызды шарасы. Бұл - Президенттің алдымызға қойып отырған басты міндеттерінің бірі».

 Жалпы ауданда құрылысы жүріп жатқан нысандардың жұмысы бекітілген кестеге сәйкес уақытылы жүргізілуін жауапты мемлекеттік органдар қатаң қадағалап отыруы тиіс. Кестеден кешігу орын алған бетте, бірден шара қолдану керек. Мердігер ұйымдарға жұмыс мерзіміне қатысты да, сапаға қатысты да қатаң талап қойылады. Биыл күзде Ақсу ауданына табиғи газ жеткізіледі. Соған алдымен жаңадан салынған әлеуметтік нысандарды, тұрғын үйлерді қосу ісін аудан әкімдігі пысықтауы керек. Кейінірек Ақсу зауытын да газға қосу қарастырылады.

• 05.05.2025
• 17