Ербол Қарашөкеев дарынды оқушылармен кездесті

Жамбыл облысының әкімі Ербол Қарашөкеев халықаралық, республикалық білім-ғылым бәсекелерінде топ жарған 132 дарынды оқушымен кездесті.

– Сіздердің қажырлы еңбектеріңіз бен үздіксіз ізденістеріңіздің арқасында еліміздің, соның ішінде өңіріміздің абыройы халықаралық деңгейде асқақтап келеді. Бұл – біз үшін үлкен мәртебе. Түрлі сайыстарда жеткен жетістіктеріңіз – үлкен өмірге сенімді қадам, жарқын болашақтың бастауы деп білемін. Сіздер – ел ертеңінің тірегі, ұлт үмітін арқалаған жас буынсыздар. Армандарыңыз асқақ, мақсаттарыңыз айқын болсын! Тәуелсіз Қазақстанның жарқын болашағы – сіздердің табандылықтарыңыз бен талпыныстарыңызға тікелей байланысты, – деді облыс әкімі.

Ербол Қарашөкеев дарынды жастардың ата-аналары мен ұстаздарына шынайы ризашылығын білдіріп, оларға алғыс айтты. Сонымен қатар мектепті аяқтап жатқан 14 мыңнан астам түлекке сәттілік тіледі.

2024–2025 оқу жылында облыс оқушылары халықаралық және республикалық олимпиадалар мен жарыстарда 464 медаль (77-сі халықаралық) жеңіп алды.

Республикалық олимпиада қорытындысы бойынша Жамбыл облысының мектеп оқушылары «Ең үздік олимпиадалық команда» атағын иеленсе, ғылыми жобалар байқауында қатарынан 16 жыл бойы «Ең үздік команда» атағын сақтап келеді.

Өңірдегі 5 білім ұясы «100 үздік мектептің» қатарына кірді. Олардың қатарында Дарынды ер балаларға арналған және Айша бибі атындағы дарынды қыз балаларға арналған «Білім-Инновация» лицей-интернаттары, Тараз қаласындағы №41, Б. Бесбаев атындағы және Жамбыл атындағы №5 мектеп-гимназиялары бар.

Биыл Абай, Мағжан, Ілияс, Әбіш, Шерхан оқуларына 109 оқушы қатысып, оның 76-сы жеңімпаз атанды.

Кездесуде Дарынды ер балаларға арналған мамандандырылған «Білім-Инновация» лицей-интернатының оқушысы Қанат Нұрғанат пен Меркі ауданындағы М. Жылысбаев атындағы орта мектептің оқушысы Диас Жолшыбек замандастары атынан сөз алып, мемлекет пен облыс басшылығына алғыс білдірді.

Ел намысын қорғап, өңір абыройын асқақтатқан озат оқушыларға облыс әкімінің құттықтау хаты мен қаржылай сертификаты табысталды.

Сондай-ақ өскелең ұрпақты тәрбиелеу мен оқытуда ерекше жетістікке жеткен 12 ұстаз «Облысқа сіңірген еңбегі үшін» белгісімен, облыс әкімінің Құрмет грамотасы және Алғыс хатымен марапатталды.

Шара соңында облыс әкімі оқушылармен бірге естелік суретке түсті.

• 02.06.2025
• 23