Туризм және спорт министрлігі құтқарушылардың жетуіне қиындық тудыратын таулы аймақтардағы бағыттар туралы міндетті хабарлама енгізуді ұсынды

ҚР Туризм және спорт министрлігі туристердің таулы аймақтардағы қауіпсіздігін қамтамасыз ету мақсатында заңнамаға түзету енгізуді ұсынып отыр. Жаңа норма бойынша туристер жету қиын таулы аймақтарға сапар алдында Төтенше жағдайлар министрлігінің бөлімшелеріне өз маршруттары туралы міндетті түрде алдын ала хабар беруге тиіс.

Туризм және спорт министрі Ербол Мырзабосынов Үкімет отырысында туристердің қауіпсіздігін қамтамасыз етуге бағытталған шараларды таныстырды. Бұл шаралар салалық мемлекеттік органдармен бірлесе жүзеге асырылуда. Министр атап өткендей, әсіресе жаз мезгілінде таулы жерлердегі туристердің қауіпсіздігіне ерекше назар аудару қажет.

Кейінгі 5 жылда еліміздің таулы аймақтарында 400-ден астам іздестіру-құтқару жұмыстары жүргізілген. Тек былтырғы жазғы маусымның өзінде туристерге қатысты 112 оқиға тіркелген.

Бұдан бөлек, қауіпсіздікті арттыру мақсатында Алматы маңындағы шалғай жерлерде 18 шағын үй орнатылған. Аталған үйлер ондаған адамның өмірін сақтап қалуға көмектесті. Олар пеш, алғашқы медициналық көмек қобдишасы, қуаттағыш құрылғы, көрпе секілді төтенше жағдайда шұғыл қажетті алғашқы көмек жинақтарымен жабдықталған. Сонымен қатар шағын үйлерде спутниктік байланыс арқылы «112» және «109» қызметтеріне SOS белгісін беретін дабыл батырмалары орнатылған. Осы тәжірибені еліміздің өзге де өңірлерінде енгізу ұсынылуда.

Айта кетейік, былтыр ел ішінде саяхаттаған отандық туристер саны 10 миллионнан асты. Туризм және спорт министрлігі туристердің қауіпсіздігін қамтамасыз ету бойынша жүйелі шараларды уәкілетті органдармен бірлесіп жалғастыра бермек.

• 10.06.2025
• 22