Ауылға барған дәрігерге - 10 млн. теңге: Жетісу облысы маман тапшылығын қалай шешуде?

Жетісу облысында дәрігер тапшылығы мәселесін шешу мақсатында өткен жылдан бастап республика бойынша алғаш рет өңірде дәрігерлерге көтерме ақы төлене бастады. Қабылданған шаралардың нәтижесінде облыстағы кадр тапшылығы 20,3%-ға қысқарды.

Жүзеге асырылып жатқан бағдарламаның аясында жергілікті бюджет есебінен ауылдық жерлерге жұмыс істеуге келген дәрігерлерге 10 млн. теңгеден, ал қалаға келгендерге 5 млн. теңге көлемінде көтерме ақы төленеді. Ол үшін алдымен үш айлық сынақ мерзімінен сәтті өту керек. Бұдан әрі дәрігер сол өңірдегі медицина мекемесінде кемінде бес жыл жұмыс істеуі тиіс.

Облыс әкімдігі өз тарапынан заманауи медициналық жабдықтармен қамтамасыз етіп, ауруханалар мен емханалар салуға көп көңіл бөліп келеді. Бұл ретте тек қалаларда ғана емес, бірінші кезекте ауылдық жерлерге ерекше назар аударып отырмыз. Дегенмен көп нәрсе дәрігерлердің, жалпы медицина қызметкерлерінің біліктілігіне байланысты. Сондықтан қолда бар мүмкіндіктерді пайдаланып, ерте диагностикалау мен дұрыс диагноз қоюға ерекше көңіл бөліп, сапалы ем жүргізу керек. Бұл ретте өз ісіне адал, үнемі біліктілігін арттырып отыратын, жауапкершілігі бар мамандардың рөлі елеулі. Өйткені медицина - жай бір қатардағы жұмыс емес, адам өз өмірі мен денсаулығын сеніп тапсыратын  аса жауапты кәсіп. 

• 13.06.2025
• 41