ҚҰРМЕТТІ ПОЛИЦИЯ ҚЫЗМЕТКЕРЛЕРІ МЕН АРДАГЕРЛЕР!

Сіздерді кәсіби мерекелеріңіз – Полиция күнімен құттықтаймын!

Ішкі істер органдары – еліміздің тыныштығы мен азаматтар қауіпсіздігінің тірегі. Қоғамдағы тәртіп пен заңдылықтың сақталуы – Сіздердің табанды еңбектеріңіздің нәтижесі.

Полиция қызметі – жанқиярлықты, батылдықты және темірдей тәртіп пен төзімділікті талап ететін ерекше сала. Осы жолды таңдаған әр қызметкер өзінің отанына, халқына адалдықпен қызмет етуді мақсат тұтады. Бұл тұрғыда өңірдегі тәртіп сақшылары да аянбай еңбек етіп келеді деп сеніммен айтта аламын!

«Полиция тәртіп сақшысы екенін сөз жүзінде емес, іс жүзінде дәлелдей білуге тиіс. Мұнда жоғары дайындықпен келген және өз ісіне шынайы берілген мамандар жұмыс істеуі қажет», – деп Мемлекет басшысы Қасым-Жомарт Кемелұлы баса айтқан болатын.

Бұл – Сіздерді кәсіби шеберлікке, азаматтарға ашық болуға және әрбір шағым мен күдікке жауапкершілікпен қарауға шақырады.

Сіздерге зор денсаулық, тыныш күндер, қызметтеріңізге сәттілік пен абырой, отбасыларыңызға амандық тілеймін! Ел үшін еткен еңбектеріңіз әрдайым бағалана берсін!

• 23.06.2025
• 31