Ербол Мырзабосынов Алматы қаласындағы спорт нысандарын аралады

Туризм және спорт министрі Алматыға жасаған жұмыс сапары аясында бірқатар маңызды спорт мекемелерінің жұмысымен танысты.

Министр ең алдымен К. Ахметов атындағы Олимпиада резервінің республикалық мамандандырылған мектеп-интернат-колледжіне ат басын бұрды. Бұл жерде 503 спортшы білім алуда, олардың қатарында:

* 15 халықаралық дәрежедегі спорт шебері;
* 69 спорт шебері;
* 347 спорт шеберлігіне кандидат;
* 72 түрлі спорттық дәрежесі бар спортшы бар.

Мекеме олимпиадалық 15 спорт түрі бойынша резерв дайындайды. Жаттығу үдерісін 50 бапкер жүргізеді, оның ішінде 11-і – еңбек сіңірген жаттықтырушы. Биыл 190-нан астам тәрбиеленуші ұлттық құрама сапына енді.

Келесі нысан – спорттық жаттығу кешені болды. Мұнда теннис, жүзу, волейбол, баскетбол, футбол, дзюдо және басқа да спорт түрлері бойынша дәрістер өтеді. Арена 2500 көрерменге арналған және республикалық әрі халықаралық жарыстар өткізу үшін жиі пайдаланылады.

Сапар аясында министр «Қайрат» академиясына да барды. Мұнда 8 бен 13 жас аралығындағы балалар бірыңғай әдістеме бойынша жаттығады. Жаттығу барысы жүйелі түрде қадағаланады. Спортшылардың денсаулығына ерекше мән беріледі: арнайы журнал арқылы ойыншылардың жағдайы, жарақаты мен қалпына келу үдерісі тіркеліп отырады. Академияның еліміздің әр өңірінде 11 филиалы бар.

Сапар қорытындысында Ербол Мырзабосынов «Қайрат» академиясының спортшыларды кешенді дайындаудың тиімді үлгісін көрсетіп отырғанын атап өтті. Бұл үлгінің негізінде:

* кәсіби кадрлық база;
* заманауи инфрақұрылым;
* ғылым мен білімнің өзара ықпалдастығы жатыр.

Министр К. Ахметов атындағы мектеп-интернаттағы семсерлесу спорты бойынша дайындықты жеке атап өтіп, спорттық интернаттардың бірқатары жүйелі жаңғыртуды қажет ететінін айтты.

Оның айтуынша, келесі мәселелерге ерекше көңіл бөлінуі тиіс:

* материалдық-техникалық базаны жақсарту;
* федерациялар мен бейінді жоғары оқу орындарымен бірлесе отырып кадр әлеуетін нығайту.

Сапар соңында министр келесі кезеңге арналған басты міндеттерді белгіледі:

* спорт нысандарын түгендеу;
* әр нысан бойынша басым спорт түрлерін айқындау;
* федерациялармен, университеттермен және ғылыми орталықтармен бірлесіп спортшыларды дайындаудағы ғылыми-білім беруді күшейту жоспарын әзірлеу.

• 28.08.2025
• 31