БҚО-да еліміздегі ең ірі газ-химия зауытының құрылысы басталды

Қазақстан Республикасының Президенті өз Жолдауында өңдеу өнеркәсібіне инвестициялар тарту мен жоғары технологиялық өндірістерді дамыту – мемлекетіміздің басты міндеттерінің бірі екенін атап өтті.
Осы орайда, облысымыздың Бәйтерек ауданы, Белес ауылдық округінде метанол өндіретін газ-химиялық кешенінің құрылысын бастауға арналған капсула салу рәсімі өтті.
Еліміздің газ-химия саласындағы стратегиялық маңызды жоба Zhaik Petroleum LTD компаниясының бастамасымен жүзеге асырылуда.
Метанол – заманауи химия өнеркәсібінің негізгі шикізаты. Ол пластмасса, бояу, дәрі-дәрмек, тұрмыстық және өндірістік химия, сондай-ақ экологиялық таза отын өндіруде кеңінен қолданылады.
Инвестиция көлемі – 78,8 млрд теңге, ал өндірістік қуаттылығы – жылына 130 мың тонна метанол. Кешеннің құрылысы жыл соңында басталып, келесі жылы толық аяқталып, 2027 жылы іске қосылады. Құрылыс кезеңінде және өндіріс іске қосылғаннан кейін 467 жаңа жұмыс орны ашылады. Жобада заманауи технологиялар қолданылып, отандық газ ресурстары өңделеді.
Метанол өндірісін іске қосу Қазақстанның технологиялық тәуелсіздігін арттырып, газ ресурстарын терең өңдеуге мүмкіндік береді. Сонымен қатар бұл жоба өңірдің экономикалық өсімін, жаңа жұмыс орындарын және жергілікті бюджеттің тұрақты түсімдерін қамтамасыз етеді.

• 17.10.2025
• 51