Биыл Павлодарда 25 есе көп көшет отырғызылмақ

Павлодар облысы әкімінің орынбасары Асайын Байханов Экологиялық кодекс жөніндегі кеңес отырысында көгалдандыру және қоршаған ортаны қорғаудың басқа да бағыттары жөніндегі жоспарлар туралы баяндады.  Басқосу өндірістік кәсіпорындар мен экологиялық қоғамдастық өкілдерінің қатысуымен өтіп, экология, геология және табиғи ресурстар вице-министрі Ахметжан Прімқұловтың жұмыс сапарына орайластырылды.

Экология вице-министрі жаңа Экологиялық кодекс нормаларының жергілікті экологиялық мәселелердің шешілуіне қалай әсер ететіні туралы түсініктемелер берді.   2021 жылдың 1 шілдесіне күшіне енетін аталған заңнаманың негізгі бағыттары ретінде ең үздік әрі қолжетімді технологияларды енгізу, қоршаған ортаға залал келтіру үшін жауапкершілікті қатаңдату, "ластаушы ақы төлеп, жағдайды түзейді" қағидатын енгізу және экологияға әсер ететін шешімдер қабылдау кезінде жұртшылықтың рөлін күшейту шаралары бекітілген.

- Ең үздік қолжетімді технологиялар ірі кәсіпорындарды экологияландыру үшін енгізілетін болады – олардың дені өткен ғасырдың 50-60-жылдарынан бастап жұмыс істеп келеді. Бұл маңызды шара. Сондай-ақ, біз Қазақстанда да, бүкіл әлемде де экологиялық проблемаларға жұртшылық тарапынан бөлініп жатқан назардың артып бара жатқанын байқап отырмыз. Жаңа Экологиялық кодекс жұртшылықтың пікірін жете ескеріп, іске асыруға мүмкіндік береді, - деді Ахметжан Прімқұлов, - Жауапкершіліктің қатайып, қоғам рөлінің күшеюі кәсіпорындарға экологиялық таза технологияларға көшіп, эмиссиялар көлемін төмендетуден басқа амал қалдырмайды – бұл экологиялық ахуалдың жақсаруына алып келеді.

Оның айтуынша, Экологиялық кодексті іске асырудың жалпы ел үшін, оның ішінде әр өңір үшін маңызы зор. Қолданысқа енгізілгелі отырған жаңашылдықтарға байланысты еліміздің Кәсіпкерлік, Қылмыстық, Су кодекстерінің кейбір нормалары қайта қаралып, барлығы 140-қа жуық нормативтік құқықтық актілерді қабылдау жоспарланып отыр.

Павлодар облысы әкімінің орынбасары А.Байханов өңірде қолға алынған қоршаған ортаны қорғау жұмыстарының бағыттары бойынша анықтама берді: өнеркәсіптік қалдықтарды азайту, көгалдандыру, қалдықтарды басқару, су ресурстарын реттеу және жұртшылықтың экологиялық мәдениетін өсіру.

- Біз елді мекендерімізді көгалдандыру тәсілін айтарлықтай өзгерттік, - деді аймақ басшысының орынбасары, - 2020 жылы Павлодарда барлығы 800-ге жуық ағаш отырғызылса, биыл облыс орталығында отырғызылатын көшеттер саны 20 мыңға дейін жеткізіледі. Алдағы бес жылда облыс аумағында 95 миллионға жуық көшет отырғызу жоспарланып отырса, оның 32 миллионы жергілікті атқарушы органдар есебінен егілмек.

Экологиялық жағдайды жақсартуға қатысты пікірлерімен басқосуға қатысқан қоғам қайраткерлері де бөлісті. Биолог Татьяна Пономарева көгалдандыру жұмыстарының тек жүйелі түрде жұргізілуі тиіс екенін атап өтті.
- Қалалық қоршаған ортаның қазіргі жағдайын, өсімдіктердің түр-түрімен мұқият іріктелуін, оларды өсірудің жаңа технологиялары мен ағаштар мен бұталарды күтіп-ұстаудың заманауи әдістерінің пайдаланылуын ескере отырып, нақты тұжырымдалған бағдарлама – көгалдандырудың маңызды құрамдас бөлігі, - деді ол, - Біз қолданып келген көгалдандыру және абаттандыру ережелері 2018 жылы қысқартылып, бүгінде көгалдандыру мәселелерін шеше алмайды.

"Эком" бірлестігінің басшысы Светлана Могилюк жұртшылықтың жаңа жобалар бойынша тыңдауларға қатысу мәселесіне қайта оралды. Оның пікірінше, қоршаған ортаға тигізіліп жатқан әсерді бағалау мәселесін талқылауға ниет білдіргендерге рұқсат беріліп жатқанымен, осы жұмыстың тиімділігі мәселесін шешу әлі де уақыт еншісінде.

- Жаңа кодекс мүмкіндіктерімізді көбейтіп, қоғамдық тыңдау рәсімі күрделене түсті, бірақ олар қашан да, барлық жерде де сапалы өте қоймайды, - деді қоғам өкілі, - тыңдауларды өткізу үшін орталықтандырылған алаң қажет. Жұртшылық қабылданып жатқан шешімдерге ықпал ету мүмкіндігіне ие болуы қажет.

Экология вице-министрі Ахметжан Прімқұлов кездесуде айтылған барлық пікірлердің ескерілетінін айтты. Ол жұртшылық пен бизнес өкілдерін аталған нормативтік құқықтық актілерді әзірлеуге тікелей атсалысуға шақырды. 

• 16.03.2021
• 294