ҚР Оқу-ағарту министрі Жамбыл облысына жұмыс сапарымен келді

Жамбыл облысының орталығы – Тараз қаласында ҚР Оқу-ағарту министрі Жұлдыз Сүлейменова мен өңір басшысы Ербол Қарашөкеевтің қатысуымен балалардың құқықтарын қорғау және қауіпсіздігін қамтамасыз ету жөнінде кеңес өтті.

Жиынға ҚР Парламенті Мәжілісінің депутаттары, құқық қорғау және мемлекеттік орган басшылары, мектеп пен колледж директорлары, ардагер ұстаздар мен ата-аналар қатысты.

Ал ҚР Бала құқықтары жөніндегі уәкілі Динара Закиева, ҚР Бас прокурорының көмекшісі Нұрбосын Мақашев және оңтүстік өңірлердің білім саласына жауапты өкілдері бейнебайланыс арқылы қосылды. 

Жұлдыз Сүлейменова кеңес барысында білім беру саласындағы өзекті мәселелерге тоқталып, арнайы жұмыс тобының облыс мектептерінде жүргізген тексеріс нәтижесін баяндады. Министр тәрбие саласында әлі де жүйелі жетілдіруді қажет ететін бағыттар бар екенін атап өтті.

– Кәмелетке толмағандар арасындағы құқықбұзушылықтың алдын алу – мемлекеттің айрықша назарындағы мәселе. Өйткені баланың қауіпсіздігі – жеке тағдырдың ғана емес, тұтас қоғам тұрақтылығының кепілі. Бүгінгі басқосу – осы бағыттағы жұмысты жетілдіруге арналған маңызды қадам.

Соңғы уақытта балаларға қатысты орын алған оқиғалар жағдайды жан-жақты қарауды талап етіп отыр. Тек өзара үйлесімді іс-қимыл мен бірлескен әрекет арқылы ғана өскелең ұрпаққа қауіпсіз әрі қолайлы орта қалыптастыра аламыз, – деді министр.

Өңір әкімі Ербол Қарашөкеев өз сөзінде Жамбыл облысының білім беру саласындағы даму қарқыны мен жоспарланған жобалар туралы мәлімет берді.

2025 жылы  білім саласына 344,3 млрд теңге бөлінген.

26 білім нысанының құрылысы жүргізілуде, жыл соңына дейін 10 мектеп пен 5 мектептің жапсарлас ғимараты пайдалануға берілмек. Ал 2026 жылы 11 жаңа нысан іске қосылады.

«Келешек мектептері» ұлттық жобасы аясында бүгінге дейін 6 мектеп ашылып, жыл соңына дейін тағы 1 мектеп пайдалануға беріледі деп күтілуде. Сонымен қатар бірқатар білім беру мекемелері күрделі жөндеуден өтті. Мектептер 1,7 млрд теңге көлеміндегі заманауи материалдық-техникалық құралдармен жабдықталды.

Биылғы оқу жылында «Дарын» мамандандырылған лицей-интернаты жаңа заманауи құралдармен жабдықталған ғимаратқа көшірілді. 

Сондай-ақ облыста тұңғыш дарынды ер балаларға арналған мамандандырылған әскери мектеп-интернаты ашылды.

– Балалардың құқықтарын қорғау және қауіпсіздігін қамтамасыз ету – біздің басты әлеуметтік басымдықтарымыздың бірі. Әр баланың сенімді қорғалуын қамтамасыз ететін жүйе қалыптастырудамыз.

Осы мақсатта облыста Балалардың құқықтарын қорғау басқармасын құру бағытында нақты қадамдар жасалды.

Жаңа басқарма балалардың құқықтары мен мүдделерін қорғау, отбасыларға көмек көрсету және осы саладағы қызметтердің жұмысын үйлестірумен айналысатын болады, – деді өңір басшысы.

Кеңес барысында ҚР Бала құқықтары жөніндегі уәкіл Динара Закиева, облыстық полиция департаментінің бастығы Қайсар Сұлтанбаев, облыс прокуратурасының басқарма басшысы Ердос Мақашев және облыс әкімінің орынбасары Серік Сәлемов сөз сөйледі.

Жиын сұрақ-жауап форматында жалғасып, министр қатысушылардың сауалдарына жауап берді. Кеңесте айтылған ұсыныстарды жүзеге асыру мақсатында арнайы іс-шаралар жоспары әзірленетін болады.

Жұмыс сапары аясында министр Жұлдыз Сүлейменова Тараз қаласы, сондай-ақ Байзақ және Жамбыл аудандарындағы бірқатар білім беру нысандары мен орталықтардың жұмысымен танысты.

• 05.11.2025
• 7