«Заң мен тәртіп» қағидаты: Таразда велошеру өтті

Жамбыл облысының әкімі Ербол Қарашөкеев қоғамда «Заң мен тәртіп» қағидатын қалыптастыру және салауатты өмір салтын насихаттау мақсатында өткен велошерудің ашылу салтанатына қатысты.

Өңір басшысы қоғамдық тәртіп пен азаматтық жауапкершілікті арттыруға үлес қосып жүрген тараздықтарға алғыс айтты.

Шара барысында облыстық спорт ардагерлері кеңесінің төрағасы Тәуірбек Қарауылтегі тұрғындарды белсенді өмір сүру салтын ұстануға шақырды.

Велошеруге 300-ден астам адам қатысты.

Жарыс жолы «Достық» алаңынан басталып, «Қазақ хандығы» монументіне дейінгі 7 шақырымдық қашықтықты қамтыды.

Мәреге алғаш жеткендерге кубок, медаль және естелік сыйлықтар табыс етілді.

Айта кетейік, соңғы жылдары өңірде велоспорт қарқынды дамып келеді. Қазіргі таңда 7 жаттықтырушы мен 130 спортшы тұрақты түрде дайындалып, ел намысын абыроймен қорғап жүр.

• 12.11.2025
• 7