БҚО-ДА ҚХА-НЫҢ 30 ЖЫЛДЫҒЫНА АРНАЛҒАН «БІРЛІК ПЕН КЕЛІСІМ ЖОЛЫНДАҒЫ 30 ЖЫЛ» АТТЫ ҚОРЫТЫНДЫ ШАРА ӨТТІ

БҚО-да Қазақстан халқы Ассамблеясының 30 жылдық мерейтойына арналған «Бірлік пен келісім жолындағы 30 жыл» атты қорытынды салтанатты шара өтті.

Іс-шарада Қазақстан халқы Ассамблеясының қоғамдағы тұрақтылықты сақтау, этносаралық келісімді нығайту және ел бірлігін бекемдеудегі рөлі ерекше атап өтілді.  

Еліміздегі этносаралық келісім мен қоғамдағы татулықты қамтамасыз етуде Президентіміздің маңызды тапсырмаларының бірі – этносаралық саладағы ақпараттық-түсіндіру жұмыстарын жүйелі жүргізу. Осыған орай, Батыс Қазақстан облысы Қазақстан халқы Ассамблеясы жанынан ақпараттық-түсіндіру топтары құрылып, тұрғындармен тұрақты кездесулер өткізіліп келеді. Қазақстан халқы Ассамблеясының 30 жылдығы — бұл жай ғана дата емес, ол қоғамның жетілуі мен Қазақстанның тұрақты болашағының негізі болып табылатын бейбітшілік пен келісім құндылықтарына деген берік сенімділіктің символы.

Қазақстан Республикасының Президенті, Қазақстан халқы Ассамблеясының төрағасы Қасым-Жомарт Кемелұлы Тоқаевтың атынан ел бірлігін нығайту, татулық пен келісімді сақтау, рухани мәдениетті дамыту ісіне елеулі үлес қосқан азаматтарға «Бірлік» медалі мен алғыс хаты табысталды.

Қазіргі таңда Батыс Қазақстан облысы Қазақстан халқы Ассамблеясы жанында 300-ден астам кеңестер мен орталықтар, 50-ден астам этномәдени бірлестік қызмет етеді. Олар өңірдегі этносаралық келісімді нығайтуға, қоғамдық пікірді тұрақтандыруға, ортақ құндылықтарды дәріптеуге айтарлықтай үлес қосып келеді.

• 20.11.2025
• 5