Құрметті сарбаздар мен сержанттар, офицерлер, генералдар мен адмиралдар! Құрметті отандастар!

Қазақстан Республикасы Қорғаныс министрлігінің атынан және жеке өз атымнан сіздерді еліміздің егемендігін, бірлігі мен болашағы үшін жауапкершілікті айқындайтын мемлекеттік мереке — Қазақстан Республикасының Тәуелсіздік күнімен шын жүректен құттықтаймын.

Бұл күн — тек маңызды тарихи дата ғана емес, сонымен қатар халқымыздың еркіндік пен дербестікке деген ғасырлар бойғы асыл арманының көрінісі. Тәуелсіздік қазақ халқы бастан өткерген ауыр сынақтар арқылы, ұлттық болмысын, мәдениетін және әділеттілікке деген ұмтылысын сақтай отырып, зор қажыр-қайраттың нәтижесінде қол жеткізілген қасиетті құндылық.

Қазақстан Республикасының Президенті Қасым-Жомарт Тоқаев атап өткендей: «Тәуелсіздік — бұл жай ғана саяси мәртебе емес, ол тұрақты қорғауды, нығайтуды және саналы жауапкершілікті талап ететін ең қастерлі құндылық». Бұл сөздер еліміздің тарихи таңдауы мен стратегиялық даму бағытының мәнін толық ашып көрсетеді.

Тәуелсіздік жылдарында Қазақстан халықаралық қатынастардың беделді әрі жауапты қатысушысы ретінде қалыптасып, қауіпсіздік, экономика, гуманитарлық ынтымақтастық, білім мен ғылым салаларында өзара ықпалдастықты жүйелі түрде нығайтып келеді. Елде жүргізіліп жатқан реформалар ұзақ мерзімді дамуға бағдарланған, қуатты, орнықты және әділетті мемлекет құруға бағытталған.

Қазақстанның түрлі этностар мен мәдениеттердің ортақ үйіне айналып, қоғамдық келісімді, өзара құрмет пен жоғары азаматтық жауапкершілікті сақтап қалғанын біз заңды түрде мақтан тұтамыз.

Қазақстан Республикасының егемендігін, аумақтық тұтастығын және ұлттық қауіпсіздігін қамтамасыз етуде Қарулы Күштердің орны айрықша. Жаһандық және өңірлік қауіпсіздік архитектурасы өзгеріп отырған жағдайда еліміздің армиясы ұтқыр, кәсіби әрі заманауи технологиялармен жарақталған құрылымға жүйелі түрде трансформациялануда. Әскерлердің жауынгерлік әзірлігін арттыруға, басқару жүйесін дамытуға, жеке құрамды даярлаудың заманауи тәсілдерін енгізуге және әскерді жарақтандыруға басымдық берілуде.

Халықтың бірлігі, Қарулы Күштер жеке құрамының кәсібилігі, әскери ант пен борышқа адалдық алдағы уақытта да Отанымыздың тәуелсіздігі мен тұрақтылығының берік негізі болатынына сенімдімін.

Осы мерекелі күні Қарулы Күштердің барлық жеке құрамына және барша отандастарымызға мықты денсаулық, амандық, ертеңгі күнге деген сенім және ашық аспан, бейбіт өмір тілеймін.

• 16.12.2025
• 9