Биылғы меже - инвестиция көлемін арттыру

Мемлекет басшысы Қасым-Жомарт Кемелұлының Жолдауында өңдеу салаларына қаржы тарту арқылы жаңа инвестициялық кезеңді бастаудың маңызы айтылды. Өңірімізде де бұл бағыттағы жұмыстар жүйелі жүзеге асырылып келеді. Бүгін менің төрағалығыммен өткен инвестициялық штаб отырысында алдағы мақсат-міндеттерді жан-жақты пысықтадық.

Өздеріңізге мәлім, жуырда «KAZAKH INVEST» ҰК» АҚ Басқарма төрағасы Сұлтанғали Кенжеқұловпен кездесіп, маңызды меморандум жасастық. Оның аясында “Қолжетімділік үшін төлем” тетігі енгізіліп, инженерлік инфрақұрылым инвестордың қаражаты есебінен салынады. Нысандар пайдалануға берілгеннен кейін шығындарды индустриялық аймақтың қатысушылары мен мемлекет кезең-кезеңімен өтейді. Тың тәсіл қай тарапқа да қолайлы болмақ.

Облысымыз инвестициялық тұрғыдан тартымды аймақтардың қатарында. Президент пен Үкімет жүктеген тапсырмаларды тиісті деңгейде орындауға, әлеуетімізді тиімді пайдалануға жұмыстана береміз. Биыл негізгі капиталға тартылатын инвестиция көлемін 1 трлн 51 млрд теңгеге жеткізуді жоспарлап отырмыз.  

Штаб отырысында күн тәртібіндегі мәселеге қатысты кемшін тұстарды да талдап, Орал қаласы мен аудан әкімдеріне нақты міндеттер жүктедім. Экономикалық өсімді қамтамасыз етуде инвестицияға иек артып қана қоймай, тұрғындарға “Ауыл аманаты” сияқты мемлекеттік бағдарламаларды кеңінен түсіндіріп, кооперацияларды дамыту ісін ілгерілетуді тапсырдым.

• 26.01.2026
• 5