«Қазақстанның экспорттық-кредиттік агенттігі» АҚ Климаттық стратегияны бекітті

«Қазақстанның экспорттық-кредиттік агенттігі» АҚ (ЭКА) климаттық тәуекелдерді басқару, көміртегі әсерін азайту және экспорттық қызметтің тұрақты дамуын қолдау жөніндегі ұзақ мерзімді тәсілдерді айқындайтын Климаттық стратегияны бекітті.

Климаттық стратегияның қабылдануы ЭКА қызметіне климаттық күн тәртібін интеграциялаудағы маңызды кезең болып табылады және қаржы секторының халықаралық даму үрдістеріне, сондай-ақ тұрақты даму мен климаттық аспектілер бойынша ақпаратты ашу стандарттарының — IFRS S1 және IFRS S2 талаптарына сәйкес келеді.

Климаттық стратегия экспорттық-кредиттік қызметті жүзеге асыру кезінде климаттық тәуекелдер мен мүмкіндіктерді есепке алудың жүйелі тәсілін қалыптастыруға, ЭКА-ның өз көміртегі ізін кезең-кезеңімен қысқартуға, климаттық факторларды ескере отырып экспорттық жобаларды қолдаудың ашық әрі дәйекті тетіктерін құруға, сондай-ақ жаһандық энергетикалық көшу мен климаттық саясаттың трансформациясы жағдайында портфельдің тұрақтылығын арттыруға бағытталған.

Құжат ЭКА қызметін жүзеге асырудың бірыңғай бағдарлары мен қағидаттарын белгілейді, сонымен қатар экспортты дамыту және отандық өндірушілерді қолдау жөніндегі ынталандырушы мандатын сақтайды.

Қазақстандық экспорттаушылар үшін Климаттық стратегияның бекітілуі шикізаттық емес экспортты қолдауға басымдықтың күшеюін, өндірістерді жаңғырту мен энергия тиімділігін арттыруға жәрдемдесуді, өтпелі және әлеуметтік маңызы бар жобаларды дамытуға жағдай жасауды, сондай-ақ халықаралық серіктестер мен қаржы институттары тарапынан сенімді нығайтуды білдіреді.

Климаттық стратегия экспорттаушылар үшін қосымша шектеулер енгізуді көздемейді және ұлттық экономикалық басымдықтарды ескере отырып, халықаралық талаптар мен озық тәжірибелерге кезең-кезеңімен бейімделуге бағытталған.

ЭКА Қазақстан Республикасының қаржы секторы ұйымдарының ішінде дербес Климаттық стратегияны бекіткен алғашқы ұйымдардың қатарында. Бұл Қоғамның тұрақты даму қағидаттарына және климаттық тәуекелдерді жауапты басқаруға адалдығын көрсетеді.

Ұлттық климаттық және ESG күн тәртібін қалыптастыру жағдайында мұндай стратегияның болуы қаржы секторындағы озық тәжірибелердің дамуына ықпал етіп, ЭКА-ның экспортты дамыту институты ретіндегі рөлін нығайтады.

Климаттық стратегия әдіснамаларды, ішкі процестерді және экспорттық қызметті қолдау құралдарын одан әрі жетілдіру үшін негіз болады. Оны іске асыру экспорттық портфельдің құрылымын, Қазақстан Республикасының экономикасының ерекшеліктерін және отандық экспорттаушылардың мүдделерін ескере отырып кезең-кезеңімен жүзеге асырылатын болады.

Агенттік климаттық аспектілерді өз қызметіне интеграциялау жөніндегі жұмысты жалғастырып, экспорттың тұрақты дамуына және қазақстандық өнімнің халықаралық нарықтардағы бәсекеге қабілеттілігін арттыруға жәрдемдеседі.

• 27.01.2026
• 6