Экспортты қолдауға 200 миллиард теңге: «Қазақстанның Экспорттық-кредиттік агенттігі» мемлекеттік кепілдік алды

«Бәйтерек» холдингінің еншілес ұйымы — «Қазақстанның Экспорттық-кредиттік агенттігі» АҚ экспортты қолдауға арналған 200 миллиард теңге көлемінде, мерзімі 10 жыл болатын мемлекеттік кепілдік алды. Бұл шара агенттіктің сақтандыру міндеттемелерін қабылдау көлемін едәуір арттыруға бағытталған, соның нәтижесінде экономиканың шикізаттық емес секторында жұмыс істейтін отандық кәсіпорындарға қаржылық қолдау көрсету ауқымы кеңейтіледі.

Мемлекеттік кепілдіктің берілуі агенттіктің сақтандыру жамылғысын жоғары өтімді қамтамасыз ету деңгейіне теңестіреді. Бұл екінші деңгейлі банктердің қазақстандық экспорттаушыларды белсенді қаржыландыруына қосымша ынталандыру тудырады және халықаралық капиталды тарту, сондай-ақ шетелдік экспорттық-кредиттік агенттіктермен неғұрлым қолайлы шарттарда ынтымақтастық орнату есебінен қаржылық қызметтердің құнын төмендетуге мүмкіндік береді.

Мемлекеттік кепілдік тетігі бюджет қаражатын тікелей жұмсауды көздемейді, себебі оның мөлшері Қазақстан Республикасы Үкіметінің жабылмаған сақтандыру төлемдерінің бір бөлігін өтеу жөніндегі шартты міндеттемесі болып табылады. Сонымен қатар кепілдіктің болуы қазақстандық тауарлар мен қызметтерді жеткізу географиясын кеңейтуге ықпал етіп, экспорттаушыларға агенттіктің сақтандыру жамылғысы аясында халықаралық институттар мен ірі коммерциялық банктерден ұзақ мерзімді қаржыландыруға қол жеткізуге жол ашады. Аталған құралдарды пайдалану отандық компанияларға экспорттық келісімшарттар бойынша қаржылық тәуекелдерді тиімді түрде азайтуға және шетелдік контрагенттермен жұмыс барысында саудалық қаржыландырудың заманауи әдістерін қолдануға мүмкіндік береді.

• 27.01.2026
• 6