Қазақстанның экспорттық-кредиттік агенттігі ISO 37001 халықаралық стандартының сертификаттауынан өтті

«Қазақстанның экспорттық-кредиттік агенттігі» АҚ («Бәйтерек» холдингінің еншілес ұйымы) жемқорлыққа  қарсы іс-қимыл менеджменті жүйесінің ISO 37001:2016 халықаралық стандартының және 37001-2017 ҚР ISO СТ ұлттық стандартының талаптарына сәйкестігі бойынша сертификаттаудан өтті.

Тиісті сертификатты CERT International s.r.o. халықаралық сертификаттау органы табыстады. Аудит нәтижелері бойынша Агенттіктің қызметі сыбайлас жемқорлық тәуекелдерінің алдын алу саласындағы жоғары халықаралық және ұлттық талаптарға толық сәйкес келетіні расталды. 

ISO 37001 стандарттары ұйымдардың қызметінде жемқорлық тәуекелдерін басқарудың тиімді тетіктерін енгізуге және сыбайлас жемқорлықтың алдын алуға бағытталған. Сәйкестік сертификаттарын алу Агенттік қызметінің ашықтығын арттырудағы маңызды кезең және оның адалдық, жауапкершілік және этикалық іскерлік қағидаттарына берік ұстанымын көрсетеді.

«Жемқорлыққа қарсы күрес стандарттары бойынша сертификаттау – қабылданып жатқан шаралардың жүйелілігін мойындау ғана емес, сонымен қатар Агенттік қызметінің ашықтығын қамтамасыз етуге және сыбайлас жемқорлықтың кез келген көріністеріне нөлдік төзімділік қағидатын ұстануға мүмкіндік береді», – деп атап өтті Агенттіктің Комплаенс қызметінің басшысы Әсел Жақаева.

Менеджмент жүйесі Қоғам қызметінің негізгі процестерін қамтиды және сыбайлас жемқорлық көріністерінің алдын алуға, парақорлық тәуекелдерін басқаруға және сыбайлас жемқорлыққа қарсы талаптардың сақталуын қамтамасыз етуге бағытталған.

Қоғамда жемқорлыққа қарсы іс-қимыл менеджменті жүйесі шеңберінде сыбайлас жемқорлыққа қарсы төмендегі шаралар іске асырылады:

• сыбайлас жемқорлық тәуекелдеріне ішкі талдау жүргізу;
• сыбайлас жемқорлыққа қарсы мониторинг;
• сыбайлас жемқорлыққа қарсы мәдениетті қалыптастыру және қызметкерлерді оқыту;
• сыбайлас жемқорлыққа қарсы стандарттарды, саясаттар мен рәсімдерді енгізу және сақтау;
• басқарушылық функцияларды жүзеге асыратын тұлғалар тарапынан сыбайлас жемқорлыққа қарсы шектеулерді қабылдау;
• қаржылық бақылау шаралары;
• мүдделер қақтығысының алдын алу және оны реттеу;
• контрагенттермен сыбайлас жемқорлыққа қарсы талаптарды сақтау мәселелері бойынша өзара іс-қимыл, оның ішінде шарттарға сыбайлас жемқорлыққа қарсы ескертпелерді енгізу;
• Қазақстан Республикасының заңнамасында белгіленген тәртіппен сыбайлас жемқорлыққа қарсы іс-қимыл жөніндегі уәкілетті органға есептілік ұсыну.

Қазақстанның Экспорттық-кредиттік агенттігі сыбайлас жемқорлыққа қарсы іс-қимылды корпоративтік басқарудың ажырамас бөлігі деп қарастырады, сондай-ақ өз қызметінде адалдық, ашықтық және жауапкершілік қағидаттарын дәйекті түрде ұстанады.

• 27.01.2026
• 6