Жетісуда «алқап – қоймалау – өңдеу» принципі бойынша аграрлық жобаны іске асыру жоспарлануда

Бүгін инвесторлармен кездестім. Кездесуде ауыл шаруашылығы дақылдарын өсіру, сақтау мен өңдеу ісіне қатысты жобалар талқыланды. 

Harvest Group (Швейцария) халықаралық тобының құрамына кіретін отандық «Харвест Агро Холдинг» ЖШС өкілдері келді. Бұл компания ауыл шаруашылығы өнімдерін саудалау, тасымалдау және сақтаумен айналысады.

Кездесу барысында серіктестік өкілдері су үнемдеу технологиясын қолдану арқылы жер асты суын пайдалана отырып, суармалы жерлерді игеруге ниетті екендіктерін жеткізді. Компанияның бас директоры Дәулет Увашевтің айтуынша, Жетісу облысында серіктестік жүгері, соя, жоңышқа өсіруді жоспарлап отыр. Одан кейінгі кезеңде өңдеу ісін қолға алмақшы. Сөйтіп инвестор «алқап – қоймалау – өңдеу» принципімен жұмыс істеуге әзір екенін білдірді.

Су үнемдеу технологиясын енгізу, ауыл шаруашылығы дақылдарын өңдеу – біздің аграрлық аймақ үшін аса маңызды. Дегенмен бізге алдымен компанияның айқын бизнес-жоспарын, жобалық-сметалық құжаттамаларын таныстырсаңыздар. Содан кейін ынтымақтастықты одан әрі дамытуға дайынбыз.

Аталмыш компания бизнестің әлеуметтік жауапкершілігі аясында өңір аумағында дзюдоға арналған спорт кешенін салуды бастады.

• 12.02.2026
• 9