Ербол Қарашөкеев әйелдер қауымымен кездесті

Жамбыл облысының әкімі Ербол Қарашөкеев 8 наурыз – Халықаралық әйелдер күніне орай «Анаға тағзым» орталығында нәзік жандылармен кездесті.

Жылы шырайдағы жүздесуге әртүрлі салада жемісті еңбек етіп, кәсібилік пен жауапкершіліктің арқасында ел дамуына елеулі үлес қосып жүрген аналар мен арулар келді.

Аймақ басшысы жиналған қыз-келіншектерді көктемнің көркем мерекесімен құттықтап, олардың қоғам өміріндегі рөлін ерекше атап өтті.

– Әрбір адам үшін «Ана» ұғымы – ең қастерлі де қасиетті түсінік. Ана – отбасының ұйытқысы, шаңырақтың шуағы, қоғамның тұрақтылығы мен бірлігінің тірегі. Халқымыздың «Ананың басқан жерінде пейіш бар» деген тағылымды сөзі ананың мәртебесі мен қадір-қасиетін айшықтай түседі, – деді Ербол Қарашөкеев.

Сондай-ақ облыс әкімі киелі Әулиеата жері ежелден парасат-пайымы биік, еңбегімен елге үлгі болған аяулы аналар мен іскер арулардың мекені ретінде танылғанын атап өтті. Бұл игі дәстүр бүгінгі күні де жалғасып, өңірдің өркендеуіне өзіндік үлес қосып келеді.

– Сіздерге облыстың әлеуметтік-экономикалық дамуына қосқан сүбелі үлестеріңіз үшін шынайы алғысымды білдіремін. Отбасыларыңыз аман болып, жүздеріңізден күлкі кетпесін! Істеріңізге сәттілік, тың бастамаларыңызға толағай табыс тілеймін, – деді аймақ басшысы.

Кездесу ашық әрі еркін форматта өтіп, облыс әкімі қыз-келіншектермен өзара пікір алмасты.

Жиында білім саласының ардагері Сұлушаш Құрманбекова, «Respublica» партиясы Жамбыл облыстық филиалының төрағасы Айнұр Келімбетова, сондай-ақ «Super-Pharm» ЖШС-ның қаржы директоры Жанар Маматқұлова мен «Әсия Әлемі» ЖШС-ның директоры Ләйлә Жүнісәлиева сөз сөйлеп, көрсетілген құрмет пен ілтипатқа алғыс білдірді.

Олар ел болашағына тікелей әсер ететін жаңа Ата заң жобасы отбасы институтының нығаюына, әйелдер қауымының дамуына және қоғамдағы қадір-қасиетінің артуына оң ықпал ететініне сенім білдірді. Сонымен қатар 2026 жылғы 15 наурызда өтетін республикалық референдумға қатысу – ортақ міндет екенін айтты.

Кездесу естелік суретке түсумен қорытындыланды.

• 10.03.2026
• 4