АРҚАЛЫҚ 2.0: ҚҰЛДЫРАУ МЕН ӨРЛЕУ

Арқалық қаласы 2026 жылы да қарқынды өзгеріс үстінде. Қаладағы негізгі нысандарды, соның ішінде 30 жылдан астам уақыт жұмыс істемеген әуежайды қалпына келтіру бойынша ауқымды жұмыстар жүргізілуде.

Қостанай облысының әкімі Құмар Ақсақалов Арқалыққа жасаған екі күндік жұмыс сапары барысында қаладағы негізгі инфрақұрылымдық және әлеуметтік жобалардың іске асырылу барысын бақылап қайтты.

Негізгі жобалардың бірі – 1993 жылдан бері жұмыс істемей тұрған әуежайды қайта қалпына келтіру. Жаңа әуежай құрылысы Мемлекет басшысы Қасым-Жомарт Тоқаевтың Ұлттық құрылтайда берген тапсырмасы аясында жүзеге асырылуда және өңірдің оңтүстік аудандарын дамытуға бағытталған. Қазіргі таңда терминал мен инженерлік желілердің құрылысы жүргізілуде, аяқталуы шілде айына жоспарланған.

«Арқалық–Қостанай» және «Арқалық–Астана» бағыттары бойынша әуе қатынасын ұйымдастыру жоспарлануда. Әуежай төтенше жағдайлар кезінде логистикалық міндеттерді атқаруға да пайдаланылатын болады.

Көлік инфрақұрылымын дамыту жұмыстары да жалғасуда. Өңірде, соның ішінде Арқалық қаласында жолдар жөнделіп жатыр. Ұлытау облысы бағытына апаратын 87 шақырымдық жол учаскесі жаңартылып, бұл жол қашықтығын едәуір қысқартып, қаланың логистикалық маңызын арттырады.

«Арқалық қаласы елдің Солтүстік–Оңтүстік–Батыс бағыттарын байланыстыратын логистикалық орталыққа айналады», – деді өңір басшысы. – Мемлекет басшысының тапсырмасына сәйкес «Орталық–Батыс» жобасы жүзеге асырылуда. Бұл жоба астанадан батыс өңірлерге тікелей шығатын жаңа автокөлік дәлізін қамтамасыз етеді. Ұзындығы шамамен 900 шақырым болатын бұл жол қашықтықты 550 шақырымға дейін қысқартуға мүмкіндік береді.

Әлеуметтік салада спорт пен қолжетімді инфрақұрылымды дамытуға басымдық берілуде. 2025 жылы қалада 3 әлеуметтік нысан пайдалануға берілді: «Қазақстан» спорт кешені, күрес залы бар спорт интернаты және Мәдениет сарайы.

Қалада заманауи спорт нысандары жұмыс істеп тұр, ал биыл «Самұрық-Қазына» қоры есебінен дене шынықтыру-сауықтыру кешенінің құрылысы жоспарланған. Сондай-ақ Родина ауылында ФСК салу көзделуде. Бүгін Арқалық қаласында жабық хоккей кортының алғашқы іргетасын қалау рәсімі өтті.

Арқалық облыстық жазғы спартакиада өтетін алаңға айналады. Қала 70 жылдығы қарсаңында бұл шара ұйымдастырылады. Осыған байланысты стадионды жөндеу жұмыстары жүргізілуде.

Білім беру жүйесі де дамып келеді. «Келешек мектептері» ұлттық жобасы аясында қалада зертханалар мен IT-инфрақұрылымы бар заманауи мектеп пайдалануға берілді.

Педагогикалық институттың университетке айналуы қосымша мүмкіндіктер ашты.

«Университет мәртебесі ғылыми-зерттеу жұмыстарын жүргізуге және жаңа білім беру бағдарламаларын іске асыруға кең мүмкіндік береді. Жұмыстар толық аяқталды. Студенттер саны 5 мыңға дейін ұлғайып, журналистика, ауыл шаруашылығы және IT сияқты жаңа мамандықтар ашу жоспарлануда», – деді Құмар Ақсақалов.

Сонымен қатар өңірде теміржол инфрақұрылымы жаңартылуда, оның ішінде Арқалық вокзалы да бар. Мұнда инженерлік желілер, күту залдары, касса аймақтары жаңартылып, заманауи қауіпсіздік жүйелері енгізіледі.

«Таза Қазақстан» бағдарламасы аясында қалада абаттандыру жұмыстары жүргізілуде. Көгалдандыру, тұрғын үй қорын жаңарту және санитарлық тазалау жалғасуда. Шамамен 3 мың ағаш отырғызу жоспарланған, бүгін акция аясында 90 ағаш егілді.

2022–2025 жылдары қала ортасын жаңғырту және халықтың өмір сүру сапасын арттыру бойынша кешенді шаралар іске асырылды. Нәтижесінде:
• негізгі қоғамдық кеңістіктер мен орталық көшелер абаттандырылды;
• 35 мың шаршы метрден астам брусчатка төселді;
• балалар ойын алаңдары жүйесі құрылып, жаңғыртылды;
• «Демалыс» саябағы қайта жаңартылып, жаяу фонтан мен сахна салынды;
• 4 мың ағаш отырғызылды.

Сонымен қатар тұрғын үй қоры жүйелі түрде жаңартылды:
• 150-ден астам көпқабатты тұрғын үйдің шатырлары мен қасбеттері жөнделді;
• энергия тиімді материалдар енгізілді;
• тұрғын үй инфрақұрылымының тозу деңгейі төмендетілді.

Жұмыстар 2026 жылы да жалғасады. Бұл ретте 18 көпқабатты тұрғын үйдің қасбетін және 19 тұрғын үйдің шатырын жөндеу көзделген.

Осылайша, әуежай, теміржол вокзалы, жолдар және өзге де инфрақұрылымдарды жаңғырту қалаға жаңа серпін беріп, оны елдің маңызды көлік-логистикалық орталықтарының біріне айналдыруға мүмкіндік береді.

• 11.04.2026
• 5