ОРАЛДА АУЫЛ ӘКІМДЕРІНІҢ І ОБЛЫСТЫҚ ФОРУМЫ ӨТТІ

«Ауыл – ел тірегі: даму мен серіктестіктің жаңа кезеңі». Оралда осындай атаумен ауыл әкімдерінің І облыстық форумы өтті.  Пленарлық отырысқа ҚР Мемлекеттік қызмет істері агенттігінің төрағасы Дархан Жазықбай, өңірдегі барлық деңгейдегі атқарушы және өкілетті органдардың өкілдері қатысты.

Мемлекет басшысы Қасым-Жомарт Тоқаев 2025 жылдың 28 қарашасында өткен Ауыл әкімдерінің диалог-платформасында ауыл әкімдері жұмысының негізгі бағыттарын айқындап берді. Президент тапсырмаларының орындалуы мен ауыл-аймақтың әлеуметтік-экономикалық дамуы туралы баяндама жасалды.

   Облыста кейінгі 3 жылда салынған 30 мектептің 22-сі ауылдарда бой көтерді. «Ауылда денсаулық сақтауды жаңғырту» ұлттық жобасы аясында 50 медициналық нысан пайдалануға берілді. Барлық аудан орталықтары дене-шынықтыру сауықтыру кешендерімен қамтылды. 25 ауылда кітапхана жаңғыртылып, 2 аудандық кітапханаға жаңа ғимарат салынды. Аудан орталықтарын қоспағанда ауылдық елді мекендердің өзінде 1800-ге жуық тұрғын үй салынды. 

Ауыл әкімдері кооперацияларды дамыту, «Заң мен тәртіп» қағидатын ілгерілету және тағы басқа басым бағыттар бойынша тәжірибелерін бөлісті. Әр саладағы үздік нәтижелер үшін ауылдық округтерге 13 аталым бойынша 10 млн теңгеден қаржылай сертификат табысталды. Белсенді азаматтар, меценаттар, кәсіпкерлер облыс әкімінің алғыс хатымен марапатталды.

• 24.04.2026
• 6