ЖАСАНДЫ ИНТЕЛЛЕКТ ИГІЛІКТЕРІ: САЛАЛАРДЫ ЦИФЛАНДЫРУ ҮЛЕСІ АРТЫП КЕЛЕДІ

Бүгін ҚР Премьер-министрі Олжас Бектеновтің төрағалығымен Үкімет отырысы өтті. Күн тәртібінде экономика салаларына жасанды интеллект енгізу мәселелері қаралды.

Мемлекет басшысының 2026 жылды «Цифрландыру және жасанды интеллект жылы» деп жариялауына сәйкес, өңірде «Smart City» тұжырымдамасы аясында бірқатар жоба жүйелі түрде жүзеге асырылуда. Мәселен, тұрғындармен тиімді кері байланыс орнату мақсатында «ikomek109» бірыңғай call-орталығы тәулік бойы жұмыс істейді. Мұнда жыл басынан бері азаматтардан 22 мыңнан астам қоңырау түсіп, өтініштер бойынша нақты шаралар қабылданды. Қазіргі уақытта жүйеге жасанды интеллект элементтері енгізілуде.

Қауіпсіздік саласында Орал қаласында жасанды интеллектпен жабдықталған 300 бейнебақылау камерасы орнатылып, қоғамдық тәртіпті қамтамасыз ету деңгейі артты. Сонымен қатар, орман өрттерінің алдын алу мақсатында арнайы AI камералар іске қосылып, төтенше жағдайлардың ерте анықталуына мүмкіндік беруде. Былтыр бұл қондырғының көмегімен 3 өрт дерегі анықталып, сөндірілді.

Жуырда М.Өтемісов атындағы БҚУ-да «Tomorrow School» мектебі ашылды. Бұл кампуста жасанды интеллектіні бастапқы деңгейден күрделі жүйеге дейін қолдануды үйретеді. Қазір 50 адам оқуға тегін қабылданған.

Өңірде кейінгі 3 жылда 3 стартап іске қосылып, тағы 11 жоба жүзеге асырылуда. Денсаулық сақтау саласында жасанды интеллект элементтері енгізіліп, медициналық қызмет сапасы артуда. Мәселен, №2 қалалық емханада робот-ассистент арқылы тұрғындарды скринингке шақыру жұмыстары нәтижесінде мыңдаған адам тексеруден өтті. Сондай-ақ, мемлекеттік басқару тиімділігін арттыру мақсатында «Орал 365» ақпараттық жүйесі енгізіліп, бюджеттік жоспарлау үдерістері цифрландырылды.

• 28.04.2026
• 6