Қазақстан Республикасында қолданыстағы аукциондық сауда-саттық өткізу кестелері аясындағы қорытынды кезең болып табылатын шағын су электр станцияларын (СЭС) салу жобаларын іріктеу бойынша аукциондық сауда-саттық аяқталды.

2026 жылғы 22 мамырда Қазақстан Республикасының Бірыңғай электр энергетикалық жүйесінің (БЭЖ) барлық аймақтары бойынша жиынтық орнатылған қуаты 50 МВт болатын су электр станцияларын (СЭС) салу жобаларын іріктеу жөніндегі аукциондық сауда-саттық өтті.

Аукциондық сауда-саттыққа 5 компания жіберілді. Сауда-саттық сессиясы барысында қатысушылар тарапынан 5 баға ұсынысы беріліп, ұсынылған өтінімдердің жиынтық көлемі 21,5 МВт құрады.

Аукцион қорытындысы бойынша келесі компаниялар жеңімпаз деп танылды:

1. «Orbulaq Energy» ЖШС — жобаның орнатылған қуаты 4,9 МВт, аукциондық бағасы ҚҚС-сыз 41 теңге/кВт·сағ;
2. «QazQuat» ЖШС — жобаның орнатылған қуаты 2,4 МВт, аукциондық бағасы ҚҚС-сыз 40,80 теңге/кВт·сағ;
3. «Zhastar Quat Company» ЖШС — жобаның орнатылған қуаты 2,7 МВт, аукциондық бағасы ҚҚС-сыз 40,95 теңге/кВт·сағ;
4. «Арасан ГЭС» ЖШС — жобаның орнатылған қуаты 4,5 МВт, аукциондық бағасы ҚҚС-сыз 41,22 теңге/кВт·сағ;
5. «Компания А&Т-энерго А» ЖШС — жобаның орнатылған қуаты 7 МВт, аукциондық бағасы ҚҚС-сыз 41,23 теңге/кВт·сағ.

Аукциондық сауда-саттыққа бақылаушы ретінде Қазақстан Республикасы Энергетика министрлігінің, «Қазақстан электр энергетикалық қауымдастығы» ЗТБ-нің және «Qazaq Green» ЖЭК қауымдастығы» ЗТБ-нің өкілдері қатысты. Бақылаушылар электрондық сауда жүйесінің ашық әрі дұрыс жұмыс істегенін растады. Аталған жүйенің операторы — «KOREM» АҚ.

Қосымша мәлімет ретінде, Қазақстан Республикасы Энергетика министрлігінің 2026 жылғы 16 ақпандағы №69-н/қ бұйрығымен бекітілген 2026 жылға арналған аукциондық сауда-саттық өткізу кестелеріне сәйкес, бүгінгі күнге дейін жалпы көлемі 1045 МВт болатын 9 аукцион өткізілді. Барлық сауда-саттық бекітілген кестелерге сәйкес ұйымдастырылып өткізілді. Сонымен қатар, ірі күн электр станциялары (50 МВт) бойынша бір аукцион қатысушылар санының жеткіліксіз болуына байланысты өтпеді деп танылды.

Бүгінгі таңда 2026 жылғы өткізілген аукциондық сауда-саттық аясында жалпы орнатылған қуаты 753,11 МВт болатын 16 жаңартылатын энергия көздері жобасы іріктелді. Оның ішінде: жел электр станциялары (ЖЭС) — 450 МВт, күн электр станциялары (КЭС) — 245 МВт, су электр станциялары (СЭС) — 58,11 МВт (ірі СЭС — 36,61 МВт, шағын СЭС — 21,5 МВт).

2026 жылға арналған аукциондық сауда-саттық кестелері шеңберінде өткізілген сауда-саттық қорытындылары бойынша жобалар үшін аукциондық бағаның ең жоғары төмендеуі: КЭС бойынша — 9,0%, ЖЭС бойынша — 48,57%, СЭС бойынша — 1,04% құрады.

«KOREM» АҚ жаңартылатын энергия көздері саласындағы аукциондық сауда-саттықтың ашықтығы мен бәсекелестігін қамтамасыз ету жұмыстарын жалғастыруда.

• 22.05.2026
• 4