Жамбыл облысында шағын және орта бизнес 3,1 трлн теңгенің өнімін өндірді

Жамбыл облысында «Қазақстанның үздік тауары – 2026» өңірлік көрме-байқауы мен «Бір ауыл – бір өнім» жобасының көрмесі өтті. Ауқымды шараның ашылу салтанатына облыс әкімі Ербол Қарашөкеев қатысып, кәсіпкерлерге сәттілік тіледі.

Өңір басшысы өз сөзінде ел Президенті кәсіпкерлікті дамытуға әрдайым айрықша көңіл бөліп келе жатқанын атап өтті.

– Мемлекет басшысы өз Жолдауларында шағын және орта бизнестің экономиканың ғана емес, қоғамның да тірегі екенін үнемі айтып келеді. Бүгінде елімізде бизнесті қолдаудың тиімді тетіктері қалыптасқан. Әсіресе, отандық өндірісті өркендету, өңделген өнім көлемін арттыру және ауыл кәсіпкерлігін дамыту бағыттарына басымдық берілуде, – деді облыс әкімі.

Ербол Қарашөкеев «Қазақстанның үздік тауары» байқауы сапалы өнім өндіретін кәсіпкерлерді қолдауға жол ашса, «Бір ауыл – бір өнім» жобасы ауылдағы шағын өндірістердің дамуына серпін бергенін жеткізді. Оның айтуынша, жоба жергілікті шикізатты тиімді пайдаланып, ұлттық өнімдерді жаңғыртуға мүмкіндік беріп отыр.

Көрмеде өңір кәсіпорындарының әлеуеті мен жергілікті өнімдердің сапасы кеңінен таныстырылды. Қонақтар мен арнайы комиссия мүшелері тауар өндірушілер мен қолөнершілердің өнімдерін тамашалап, бағасын берді.

Қазір Жамбыл облысында 101 мыңнан астам шағын және орта бизнес субъектісі жұмыс істейді. Соңғы жылдары кәсіпкерлік өңір экономикасының негізгі қозғаушы күштерінің біріне айналды. Өткен жылы облыс кәсіпкерлері 3,1 трлн теңгенің өнімін өндірген. Бүгінде жалпы өңірлік өнімнің үштен бірі осы саланың үлесіне тиесілі. Ал кәсіпкерлік саласында 170 мыңға жуық адам еңбек етеді.

Жыл басынан бері қаржы институттары арқылы 10 мыңнан астам кәсіпкерге 41,6 млрд теңге көлемінде несие берілген.

Соңғы үш жылда «Бір ауыл – бір өнім» жобасы аясында тоғыз кәсіпкер финалист атанып, олардың алтауы грант иегері болды. Жалпы көлемі 24,9 млн теңгені құрайтын қаржылай қолдау өндіріс ауқымын кеңейтуге ықпал еткен.

Биылғы «Қазақстанның үздік тауары – 2026» өңірлік байқауына 120-дан астам тауар өндіруші қатысты.

«Өндірістік бағыттағы үздік тауарлар» номинациясында «Касса 01» ЖШС, «Жамбыл цемент өндірістік компаниясы» және «G Universal» ЖШС жеңімпаз атанды.

«Халық тұтынатын үздік тауарлар» аталымы «Rano Komfort Service» ЖШС, «MoozTau» ЖК және «OtarBioPharm» ЖШС-ға берілді.

Ал «Үздік азық-түлік тауарлары» номинациясында «Әулие-Ата Феникс» ЖШС, «Та-Мак» ЖШС және «AS-JAN KZ» ЖШС үздік деп танылды.

Сондай-ақ «Бір ауыл – бір өнім» жобасы бойынша қатысушылардың жұмыстары әлі де бағалануда. Қорытындысында 10 финалист іріктеліп, олар 5 млн теңгеге дейінгі гранттарға үміткер болады.

• 25.05.2026
• 5