ҚЫТАЙ ХАЛЫҚ РЕСПУБЛИКАСЫНЫҢ ЛЯОНИН ПРОВИНЦИЯСЫНЫҢ ГУБЕРНАТОРЫМЕН КЕЗДЕСУ ӨТТІ

Батыс Қазақстан облысының ресми және іскерлік делегациясы Қытай Халық Республикасына жұмыс сапарымен барып, оның аясында Ляонин провинциясының губернаторы Ван Синьвэймен маңызды кездесу өткізді. Іс-шара Қазақстан Республикасының Қытай Халық Республикасындағы Елшілігінің қолдауымен ұйымдастырылды.

Халқы 40 миллионнан асатын Ляонин провинциясы – мұнай-газ, мұнай-химия және өңдеу өнеркәсібі қарқынды дамыған, экономикалық әлеуеті жоғары аймақтардың бірі. Бұл бағыттар Батыс Қазақстан облысының да негізгі басымдықтарының қатарында. Сонымен қатар, екі өңірдің аграрлық секторды дамытудағы мүмкіндіктері мен тәжірибелері де өзара тиімді ынтымақтастықты нығайтуға жол ашады.

Кездесу барысында Қазақстан мен Қытай арасындағы жан-жақты стратегиялық әріптестік екі ел көшбасшыларының саяси ерік-жігерінің арқасында жаңа сапалы деңгейге көтеріліп келе жатқаны ерекше атап өтілді. Мемлекет басшысы Қасым-Жомарт Кемелұлы Тоқаевтың тапсырмасына сәйкес өңірде қолайлы инвестициялық ахуал қалыптастыру бағытындағы жұмыстар жүйелі түрде жалғасуда.

Бүгінде Батыс Қазақстан облысында қытайлық серіктестердің қатысуымен бірқатар ірі инвестициялық жобалар жүзеге асырылуда. Атап айтқанда, сұйық метанол өндіру, цемент зауытын салу, газ турбиналы және жел электр стансаларын іске қосу бағытындағы бастамалар өңір экономикасының жаңа даму нүктелеріне айналуда.

Өз кезегінде Ляонин провинциясының губернаторы Ван Синьвэй өңіраралық байланыстарды кеңейтуге және өзара тиімді әріптестікті жаңа деңгейге көтеруге дайын екенін жеткізді. Ол өнеркәсіп, инвестиция, сауда және логистика салаларындағы ынтымақтастықты тереңдетудің маңыздылығына тоқталды.

Қытайлық тарап экономикалық және өндірістік байланыстармен қатар мәдени-гуманитарлық ынтымақтастықты да дамытуға қызығушылық танытатынын атап өтті. Қытай мен Қазақстан арасындағы мәдениет жылы аясында білім, туризм, мәдениет және жастар алмасуы бағыттарында жаңа жобаларды жүзеге асыруға ниет білдірілді.

Кездесу қорытындысында тараптар өңіраралық байланыстарды нығайту, инвестициялық серіктестікті кеңейту және халықтар арасындағы достық қарым-қатынасты одан әрі дамыту екі елдің ортақ мүддесіне сай келетіні атап өтілді.

• 12.06.2026
• 5