ОРАЛ МЕН ЦЗИНЬЧЖОУ БАУЫРЛАС ҚАЛАЛАР АТАНДЫ

Орал мен Цзиньчжоу бауырлас қалалар атанды. Батыс Қазақстан облысы мен Ляонин провинциясы арасындағы ынтымақтастықты нығайтуға бағытталған маңызды келісімге Шэньян шаһарында өткен халықаралық конференцияда қол қойылды. 

Аспанасты еліндегі ауқымды іс-шараға батысқазақстандық делегация арнайы қатысты. 50 мемлекеттің өкілдері бас қосқан жиында Қытайдың ірі өнеркәсіптік орталығы саналатын Ляонин провинциясының әлеуеті таныстырылды.

Конференцияның жалпы отырысында өңіраралық ынтымақтастықты дамыту бойынша ұсыныс-пікірлер айтылды.

Батыс Қазақстан облысы — Қытай Халық Республикасының Төрағасы Си Цзиньпиннің Астана қаласында жариялаған «Бір белдеу — бір жол» бастамасының маңызды транзиттік торабы. Келіссөздер мен қолдаудың нәтижесінде қытайлық компаниялар сұйық метанол, цемент зауыттары, газтурбиналық және жел электр стансаларын салуға кірісті. Өзге де жоба-жоспарлар аз емес. Былтыр БҚО мен Қытай арасындағы тауар айналымы 1,5 есе өсіп, 175 млн АҚШ долларына жетті.

Ляонин провинциясына қарасты шаһарлар әлемнің 96 қаласымен бауырлас. Бүгін бұл қатарға Батыс Қазақстан облысының орталығы да қосылды. Нәтижесінде бауырластық қатынастар орнату туралы ниеттестік хаттамаға қол қойылды. 

Оның аясында тараптар сауда-экономикалық, ғылыми-техникалық, мәдени-спорттық және өзге де маңызды бағыттар бойынша тұрақты байланыс орнатуға келісілді.

• 12.06.2026
• 5