Қостанай облысының әкімі Құмар Ақсақаловтың бұқаралық ақпарат құралдары қызметкерлерін құттықтауы

Құрметті бұқаралық ақпарат құралдарының өкілдері!

Баршаңызды кәсіби мерекелеріңізбен шын жүректен құттықтаймын!

Журналистика – мәртебелі мамандық. Сіздер қоғам санасын жаңғыртып, ұлт тұтастығын нығайту жолында аянбай еңбек етіп келесіздер. Журналист қауымды «ұлттың үні, қоғамның айнасы» деп бекер атамайды. Ел өміріндегі маңызды оқиғаларды халыққа жедел әрі сапалы жеткізіп отырсыздар.

Қазақ журналистикасының тарихы Тобыл-Торғай жерінен бастау алады. Мұхамеджан Сералин, Бейімбет Майлин, Нәзипа Құлжанова – ұлттық баспасөздің негізін қалаған тұлғалар. Олардың ізін басқан бүгінгі буын да елдің әлеуметтік-экономикалық дамуын, мәдени тынысын және халықтың мұң-мұқтажын билікке жеткізіп келе жатқан алтын көпір.

Алаш қайраткері Міржақып Дулатұлы: «Қай елдің баспасөзі мықты болса, сол елдің болашағы да мықты» деген.

Біздің мақсатымыз – бір, ол – Әділетті Қазақстанды құру.

Сіздер Ел Президенті бастамашы болған «Заң мен Тәртіп», «Адал азамат» қағидаттарын және «Таза Қазақстан» бағдарламасын кеңінен дәріптеп келесіздер. Биыл Жаңа Конституцияны талқылау және қабылдау жолында халыққа шынайы, жан-жақты ақпарат тараттыңыздар.

1 шілдеден бастап жаңа Ата Заң күшіне енеді.

Елде жүргізіліп жатқан реформалар аясында бұқаралық ақпарат құралдарына арналған «Масс-медиа туралы» заң қабылданды. Осыған орай журналист қауымның объективтілік, жауапкершілік және кәсіби этика қағидаттарына деген адалдығы бұрынғыдан да арта түсетініне сенім білдіремін.

Осы өзгерістердің барлығы елімізде жүзеге асырылып жатқан ауқымды жаңғыру үдерісінің бір бөлігі. Қазіргі геосаяси сын-қатерлер жағдайында әлем қарқынды өзгеріп жатыр. Сол өзгерістермен бірге Қазақстан да дамып, жаңа белестерді бағындыруда. Мемлекет басшысы жүргізіп отырған дәйекті реформалар мен ауқымды бастамалардың арқасында еліміз тұрақты экономикалық өсімге қол жеткізіп, өнеркәсіпті жаңғырту, инфрақұрылымды дамыту және азаматтардың өмір сүру сапасын арттыру бағытында сенімді қадам жасап келеді.

Экономиканы әртараптандыруға, отандық өндірісті қолдауға, инвестиция тартуға, өңірлерді дамытуға және әрбір қазақстандық үшін жаңа мүмкіндіктер жасауға ерекше көңіл бөлінуде.

Осы оң өзгерістердің барлығы бұқаралық ақпарат құралдарының материалдарында кеңінен көрініс табуда. Журналистердің кәсіби еңбегінің арқасында облыс тұрғындары мемлекеттік бастамалардың жүзеге асырылуы, өңірдің жетістіктері және Қостанай облысының әрбір қаласы мен ауданындағы игі өзгерістер туралы дер кезінде хабардар болып отыр.

Дәл сіздер мемлекет пен қоғам арасындағы байланысты нығайтып, ашық диалогтың дамуына, азаматтардың сенімін арттыруға және объективті қоғамдық пікірдің қалыптасуына үлес қосып келесіздер.

Бүгінде облысымызда 118 бұқаралық ақпарат құралы тіркелген. Әрбір басылымның, телеарнаның, радиостанцияның және интернет-платформаның артында өз ісіне адал, кәсіби мамандар еңбек етуде.

Сіздердің қажырлы еңбектеріңіздің арқасында өңір тұрғындары мемлекеттік бағдарламалардың жүзеге асырылуы, жаңа өндірістердің іске қосылуы, инфрақұрылымның дамуы, білім, мәдениет, спорт және басқа да салалардағы жетістіктер туралы шынайы әрі жедел ақпарат алып келеді.

Ақпарат ағыны қарқынды дамыған қазіргі кезеңде журналистің жеделдігі, объективтілігі мен жауапкершілігі қоғам сенімінің басты кепілі болып табылады.

«Сөз сүйектен өтеді» дейді халқымыз. Журналист үшін бұл қағиданың мәні ерекше. Әрбір жарияланған сөз адамдарды біріктіріп, қоғамдық келісімді нығайтып, ертеңгі күнге деген сенім ұялатып, игі істерге жігерлендіре алады.

Сондықтан жоғары кәсіби жауапкершілік, объективтілік, нақтылық пен шынайылық қағидаттарына адалдық журналист мамандығының басты негізі болып қала береді.

Қостанай журналистикасы әрдайым жоғары кәсіби мәдениетімен, өңірлік күн тәртібін терең түсінуімен және оқырманға, көрерменге, тыңдарманға деген құрметімен ерекшеленіп келеді. Журналистер қауымының еңбегі республикалық деңгейде лайықты бағаланып отырғанын мақтан тұтамыз.

Соның айқын дәлелі – кеше ғана «Қостанай» телеарнасының бас редакторы Ангелина Владимировна Костюкова Қазақстан Республикасының Президентінің қолынан «Ерен еңбегі үшін» медалімен марапатталды. Бұл – бір ғана маманның емес, тұтас өңірлік журналистиканың жетістігі.

Кәсіби еңбекті бағалаумен қатар, мемлекет бұқаралық ақпарат құралдары қызметкерлерінің әлеуметтік жағдайына да ерекше көңіл бөлуде. Былтырдан бері кәсіби мереке қарсаңында Мемлекет басшысының атынан журналистерге пәтер кілттері табысталуда.

Биыл республика бойынша бұқаралық ақпарат құралдары өкілдеріне 66 пәтер беру жоспарланған. Оның екеуі Қостанай облысының журналистеріне табысталады.

Бүгін сондай-ақ, отандық баспасөздің ардагерлеріне ерекше алғыс айтқым келеді. Ортамызда отырған Жайберген Болатов, Владимир Моторико, Оразалы Жақсан бастаған аға буын кәсіби мамандар қандай құрметке де лайық.

Сіздердің тәжірибелеріңіз бен өмірлік жолдарыңыз жас буын үшін үлкен өмір мектебі.

Құрметті достар!

Біз сіздердің еңбектеріңізді жоғары бағалаймыз. Атқарып отырған жұмыстарыңыз ақпарат таратумен ғана шектелмейді. Сіздер елдегі бірлік пен тұрақтылықты нығайту жолында аянбай қызмет етіп отырсыздар. Абыройлы міндетті әрі қарай адал атқара беруге тілектеспін.

Кәсіби мерекелеріңіз құтты болсын! Сіздерге зор денсаулық, отбасыларыңызға бақ-береке, шығармашылық табыс пен жаңа жетістіктер тілеймін.

Мереке құтты болсын!

• 27.06.2026
• 5