Құрметті жамбылдықтар!

Қадірлі жерлестер!

Баршаңызды ел тарихындағы айрықша маңызға ие оқиға – жаңа, халықтық Конституцияның заңды күшіне енуімен шын жүректен құттықтаймын!

Жаңа Ата Заңымыз – тәуелсіз Қазақстанның баянды болашағына негіз қалайтын маңызды қадам. Ол мемлекетіміздің даму бағытын айқындап, қоғамдық келісім мен тұрақтылықты, азаматтардың құқықтары мен бостандықтарын қамтамасыз ететін берік құқықтық іргетасқа айналады.

Мемлекет басшысы атап өткендей, жаңа Конституцияның заңды күшіне енуі – ұлт тағдырына тікелей әсер ететін тарихи оқиға. Ата Заңымыз еліміздегі ауқымды қоғамдық-саяси жаңғыруларға жол ашып, жаңа реформаларды жүзеге асыруға берік негіз қалайды.

Алдымызда Қазақстан экономикасын жаңа деңгейге көтеру, энергетикалық және инфрақұрылымдық әлеуетті нығайту, цифрлық мемлекет қалыптастыру, адам капиталын дамыту секілді маңызды міндеттер тұр. Бұл мақсаттарға тек ел бірлігі мен ортақ жауапкершілік арқылы қол жеткізе аламыз.

Ел Президенті өз сөзінде: «Түптеп келгенде, баршамыздың мұратымыз – бір. Бұл – жас ұрпақтың жарқын болашағына жол ашатын өркениетті әрі озық мемлекет құру. Біздің Қазақстаннан басқа Отанымыз жоқ. Еліміздің ойдағыдай дамуы бізге ғана керек. Ұлт болып ұйысып, жұрт болып жұмыла білсек, біз кез келген белесті бағындырамыз, көздеген мақсатымыздың бәріне қол жеткіземіз» деп баса айтқан болатын.

Шын мәнінде, бірлігі бекем елдің тірлігі берекелі болады. Жамбыл жұртшылығының да осы тарихи өзгерістерді қолдап, ел игілігі жолында бірлік пен ынтымақтың жарқын үлгісін көрсететініне кәміл сенемін.

Еліміз аман, жұртымыз тыныш, келешегіміз кемел болсын!

• 01.07.2026
• 5