Қостанай облысында еліміздегі ең ірі агрофестиваль өтеді

30 шілде мен 1 тамыз аралығында Қостанай облысы еліміздегі ең ірі аграрлық іс-шаралардың бірі – «Qostanay Dala Festivalі» агрофестивалінің алаңына айналады. Аймақ басшысы Құмар Ақсақаловтың төрағалығымен өткен облыс әкімдігінің отырысында ауқымды шараға әзірлік барысы пысықталды.

Бүгінде Қостанай облысы – еліміздің жетекші аграрлық өңірлерінің бірі. Аймағымыз агроөнеркәсіп кешенінің өңделген өнімдерін экспорттау және азық-түлік өндіру бойынша көшбасшы өңірлердің қатарында.

Агроөнеркәсіп кешенінде астық пен бидайды терең өңдейтін зауыт салу жоспарланып отыр. Онда өндірілетін негізгі өнімдердің бірі – биоэтанол болады. Лисаков қаласында май экстракциялау зауытының құрылысы жүргізілуде.

Ауыл тұрғындарын жыл бойы тұрақты жұмыспен қамту мақсатында өнеркәсіптік сүт-тауар фермаларын салуға басымдық беріп отырмыз. Бүгінде 7 заманауи сүт-тауар фермасы пайдалануға берілді. Тағы 6 ферма салынып жатыр, оның 5-еуі биыл іске қосылады.

«Осындай ауқымды форумды өткізу – біз үшін үлкен жауапкершілік қана емес, сонымен бірге облысымыздың әлеуетін республикалық және халықаралық деңгейде танытуға берілген мүмкіндік. Біз заманауи ауыл шаруашылығын, оның инвестициялық мүмкіндіктерін, ауыл шаруашылығы өнімдерін қайта өңдеу әлеуетін, цифрлық технологияларды енгізу деңгейін, ғылымның дамуы мен халықаралық ынтымақтастықтың мүмкіндіктерін көрсетуіміз керек. Фестиваль ең жоғары ұйымдастыру деңгейінде өтуі тиіс», р – деді аймақ басшысы.

Ауқымды шара Қостанай ауданының аумағында өтеді. Ал бұл агрофестиваль алдағы уақытта жыл сайын дәстүрлі түрде өткізілетін болады.

«Біз жер еңбегінің беделін арттыратын, инвесторларды тартатын және мыңдаған адамды біріктіретін ерекше мәдениетті, үлкен мерекені біртіндеп қалыптастыруға ұмтыламыз. Бұл жай ғана техника, астық немесе өзге де өнімдер сатылатын көрме не жәрмеңке болмайды. Біздің мақсатымыз әлдеқайда ауқымды. Біз жаңа іскерлік мәдениетті қалыптастыруды көздейміз. Бұл – инвесторлар өңірдің әлеуетін көретін, жастар заманауи техника мен технологияға қызығатын, ал ауыл шаруашылығы жоғары технологиялы әрі беделді сала ретінде танылатын тиімді алаңға айналуы тиіс», – деді Құмар Ақсақалов.

• 01.07.2026
• 6