Жылдың соңына дейін Қостанай ауданында екі сүт-тауарлы фермасы пайдалануға беріледі

Аймақ басшысы жұмыс сапарымен Қостанай ауданына барып, жаңадан бой көтеріп жатқан сүт-тауарлы фермаларының жұмысын тексерді.

«Ел Президенті үш жыл ішінде агроөнеркәсіптік кешендегі қайта өңделген өнім үлесін 70%-ке дейін ұлғайту міндетін қойды. Ауыл тұрғындарын жыл бойы жұмыспен қамтылуын қамтамасыз ету, өндіріс көлемін арттыру үшін мемлекет инвестициялық бастамаларға жан-жақты қолдау көрсетуде», – деді облыс әкімі.

Былтыр облыста қуаттылығы 46 мың тонна болатын 7 заманауи өнеркәсіптік сүт-тауар фермасы пайдалануға берілді. Қазіргі уақытта жалпы қуаттылығы 34 мың тонна болатын тағы осындай 6 ферма салынуда. Оның 5-еуі биыл іске қосылады, ал жыл соңына дейін тағы 4 ферманың құрылысы басталады.

Биылғы жылдың соңына дейін Қостанай ауданында 1000 және 400 басқа арналған екі сүт-тауар фермасы пайдалануға беріледі:

• «Надеждинка» ЖШС – жылдық қуаттылығы 7,5 мың тонна, инвестиция көлемі 4,2 млрд теңге, 40 жаңа жұмыс орны;
• «ДК Мақсат KZ» ЖШС – жылдық қуаттылығы 4,4 мың тонна, инвестиция көлемі 3,2 млрд теңге, 32 жаңа жұмыс орны.

«Барлық сүт-тауар фермалары жобалық қуатына шыққаннан кейін ұйымдасқан шаруашылықтардағы сүт өндірісі 2 есеге артады. Сонымен қатар, сүт өңдеу кәсіпорындарының жүктемесі 75%-дан 86%-ға дейін ұлғаяды. Қостанай ауданында аталған екі сүт-тауар фермасының іске қосылуы нәтижесінде кәсіпорындар жобалық қуатына жеткен кезде жылдық сүт өндірісі 32 мың тоннадан 44 мың тоннаға дейін артады», – деп атап өтті аймақ басшысы.

• 22.07.2026
• 9