«Таза Қазақстан»: Талдықорғандағы саябақтар мен жағалауда автоматты суару жүйесі іске қосылды

«Таза Қазақстан» бағдарламасы аясында Жетісу облысының бірқатар жасыл аймақтарында автоматты суару жүйесі орнатылды.  Биыл Талдықорғанда жалпы ұзындығы 54,8 км автоматты суару жүйесін салу жұмыстары жүргізілуде. Атап айтқанда, жобалар Қаратал өзенінің жағалауында, «Жастар» және «Ардагерлер» саябақтарында жүзеге асырылған.

«Жастар» саябағындағы көгалдандыру және жасыл желекті күтіп-баптау барысымен, автоматты суару жүйесінің жұмысымен таныстым. «Жастар» саябағының жалпы аумағы – 4,05 га, көгалдандыру аумағы – 40,5 мың м2. Бүгінгі таңда мұнда автоматты суару жүйесі іске қосылған, қазіргі уақытта көгалдандыруды қалпына келтіру жұмыстары жүргізілуде.

Біз абаттандыруда түйткілді мәселелердің бар екенін көріп, осы салада жүйелі жаңғырту жүргізу керек деп шештік. Сөйтіп саябақтарда жер астына инженерлік-коммуникациялық жүйелерін жүргізіп, су резервуарларын жасап, сорғыларын орнаттық, бетін қара топырақпен жауып, қазір көк егіп жатырмыз. Бұл көпжылдық шөп, тұрақты суарып отырса, бес-он жылға дейін өсе береді. Жетісу жер жаннаты деп бекер аталмаған, сондықтан атына сай бұл өңірдің саябақтары жап-жасыл болып тұруы тиіс. Суаруға, жалпы тазалыққа сіздердің көмекші болып жүргендеріңіз құптарлық. Қала бәрімізге ортақ, сондықтан игі істерді жастар, жалпы тұрғындар - бәріміз бірігіп атқарсақ, «Жастар» сабағын қаланың ең көркем орнының бірі ете аламыз.

Сонымен қатар суару жүйесі іске қосылған Қаратал өзенінің жағалауын араладым. Жағалауды абаттандырумен айналысатын мердігер ұйым басшылығына арам шөптерді дер кезінде шабу мен газонға тұрақты күтім жасаудағы кемшіліктерін көрсетіп бердім. Оларға абаттандыру жұмыстарына тартылған адам санын көбейтуді, сондай-ақ орын алған кемшіліктерді бір ай ішінде жоюды қатаң тапсырдым. Келесі жылы жағалау аумағында орналасқан балалар ойын және спорт алаңдарын белгіленген талаптарға сәйкес жаңарту жоспарланып отыр.

• 06.08.2026
• 6