Құрметті жамбылдықтар!

Баршаңызды Абай күнімен шын жүректен құттықтаймын!

Абай – ұлттың рухани темірқазығы, қазақ сөз өнерін биікке көтерген дара тұлға. Оның «толық адам» ілімі, ғылым мен білімге, еңбек пен елдікке үндеген тағылымы – уақыт өткен сайын мәні арта түсетін асыл мұра. Ұлы ақынның шығармалары ұрпақты білімге ұмтылуға, адал еңбек етуге, ел мен жерді қадірлеуге шақырып, ұлттық санамыздың берік негізіне айналды.

Абай есімін ұлықтау, оның өнегелі өмірі мен шығармашылық мұрасын кейінгі ұрпаққа жеткізу бағытында Жамбыл облысында да жүйелі жұмыстар жүргізілуде. Бүгінде өңірімізде Абай Құнанбайұлының есімімен 1 ауылдық округ, 2 елді мекен, 1 даңғыл, 104 көше мен тұйық жол, сондай-ақ 11 білім беру мекемесі, 1 колледж, 1 бастауыш мектеп-гимназия және 1 кітапхана аталады. Бұл – ұлы ойшылға деген халықтың құрметі мен оның рухани мұрасына деген айрықша ықыластың жарқын көрінісі.

Абай айтқан «Ғылым таппай мақтанба» деген өсиет бүгінгі ұрпақ үшін де өзекті. Сондықтан ақын мұрасын дәріптеу – өткенді ұлықтау ғана емес, болашаққа бағдар беру.

Баршаңызға зор денсаулық, отбасыларыңызға амандық, елімізге тыныштық пен береке тілеймін! Абайдың асыл сөзі мен парасатты ойы әр жүрекке жол тауып, ұрпағымыздың рухани шамшырағына айнала берсін!

Абай күні құтты болсын!

• 10.08.2026
• 5