Ербол Қарашөкеев жас офицерлермен кездесті

Жамбыл облысының әкімі Ербол Қарашөкеев Шекара қызметінің құрылған күніне орай Қазақстан Республикасы Ұлттық қауіпсіздік комитетінің Шекара академиясын және шетелдік жоғары әскери оқу орындарын тәмамдап, өңірге қызмет етуге келген жас офицерлермен кездесті.

Өңір басшысы әскери жолын енді бастаған мамандар үшін Жамбыл облысы үлкен тәжірибе мектебі болатынын атап өтті. Оның айтуынша, Әулиеата – тарихы терең, ел қорғаған ерлердің ерлігі мен өнегесі сақталған қасиетті өлке.

– Шекара – мемлекеттің қауіпсіздігі басталатын қасиетті шеп. Оның әрбір шақырымында елдің тыныштығы, халықтың қауіпсіздігі мен тәуелсіздігіміздің тұтастығы тұр. Отан шебін күзету – кез келген азаматқа бұйыра бермейтін абыройлы міндет. Офицер болу – тек жоғары әскери атаққа ие болу емес. Бұл – тәртіптің, табандылықтың, жауапкершілік пен адалдықтың үлгісін көрсету, – деді Ербол Қарашөкеев.

Облыс әкімі Бауыржан Момышұлының «Тәртіпсіз ел болмайды, тәртіпке бас иген құл болмайды» деген нақылын мысалға алып, әскери тәртіп пен антқа адалдықтың маңыздылығына тоқталды.

– Сіздердің білімдеріңіз бен кәсіби біліктеріңіз ел қауіпсіздігін қамтамасыз етуге бағытталатынына сенемін. Қандай жағдайда да сабыр сақтап, салмақты шешім қабылдай білетін, Отан алдындағы міндетін әрдайым жоғары қоятын білікті маман болыңыздар, – деді аймақ басшысы.

Кездесуде ҚР ҰҚК Шекара қызметінің Жамбыл облысы бойынша департаментінің бастығы, ұлттық қауіпсіздік полковнигі Ербол Жамаубаев сөз сөйлеп, жас офицерлерге қызмет жолында сәттілік тіледі.

Жиын соңында Қазақстан Республикасы Ұлттық қауіпсіздік комитеті Шекара академиясының түлегі, аға лейтенант Қанат Ақжолов пен Ресей Федерациясының С.М. Киров атындағы Әскери-медицина академиясын тәмамдаған лейтенант Адина Базарова облыс әкіміне көрсеткен қолдауы мен ақжолтай тілегі үшін алғыстарын білдірді.

• 20.08.2026
• 4